అచ్చెన్నకు ‘నో’ బెయిల్‌: కేసు ‘వీక్‌’ అయితే.. ఇదెలా జరిగిందబ్బా.?

మాజీ మంత్రి, టీడీపీ ముఖ్య నేత కింజరాపు అచ్చెన్నాయుడికి హైకోర్టులో చుక్కెదురయ్యింది. బెయిల్‌ కోసం అచ్చెన్నాయుడు పెట్టుకున్న పిటిషన్‌ని హైకోర్టు కొట్టి పారేసింది. ఈఎస్‌ఐ కుంభకోణంలో అచ్చెన్నాయుడు ఆరోపణలు ఎదుర్కొంటున్న విషయం విదితమే. ‘అసలు ఇది నిలబడే కేసు కాదు.. ఇందులో అచ్చెన్నకు అసలు ప్రమేయమే లేదు.. కోర్టులో ఈ కేసు వీగిపోతుంది..’ అంటూ టీడీపీ నేతలు చెబుతూ వస్తున్నారు. అంత వీగిపోయే కేసు అయితే, అచ్చెన్నాయుడికి బెయిల్‌ ఎందుకు రావడంలేదు.?

రోజులు గడుస్తున్నాయ్‌.. బెయిల్‌ కోసం నానా రకాల ప్రయత్నాలూ చేస్తున్నారు అచ్చెన్నాయుడు. అయినా, ‘బెయిల్‌’ రూపంలో ఊరట మాత్రం దక్కడంలేదు. అంటే, అటువైపు కేసు చాలా స్ట్రాంగ్‌గా వున్నట్లే భావించాలేమో. కొద్ది రోజుల క్రితం అచ్చెన్నను ఏసీబీ అరెస్ట్‌ చేయడం అప్పట్లో రాజకీయంగా పెను దుమారం రేపింది. కొద్ది రోజులు ఆసుపత్రిలో చికిత్స పొంది, ఆ తర్వాత జైలుకు వెళ్ళిన అచ్చెన్నాయుడు, తర్వాత మళ్ళీ చికిత్స నిమిత్తం ఆసుపత్రిలో చేరాల్సి వచ్చింది. రిమాండ్‌ ఖైదీగానే ఇవన్నీ జరుగుతున్నాయి అచ్చెన్నాయుడికి.

మంత్రిగా వున్న సమయంలో ఈఎస్‌ఐకి సంబంధించి మందులు, ఇతరత్రా మెడికల్‌ ఎక్విప్‌మెంట్‌ కొనుగోళ్ళ విషయమై అక్రమాలకు పాల్పడ్డారన్నది అచ్చెన్నాయుడిపై ప్రధాన ఆరోపణ. ఇదే తరహా ఆరోపణలు తెలంగాణలోనూ వచ్చాయి. అయితే, తెలంగాణలో రాజకీయ నాయకుల ప్రమేయం పెద్దగా కన్పించలేదు. పలువురు అధికారులు మాత్రం జైలుకు వెళ్ళాల్సి వచ్చింది. ఆంధ్రప్రదేశ్‌లో మాత్రం ఈఎస్‌ఐ మెడికల్‌ స్కాం రాజకీయ ప్రకంపనలు సృష్టించింది.

మాజీ మంత్రి పితాని సత్యనారాయణ పేరు కూడా ఈ కేసులో ప్రముఖంగా విన్పిస్తోంది. ఇదిలా వుంటే, బెయిల్‌ కోసం అచ్చెన్నాయుడు మరోమారు హైకోర్టును ఆశ్రయిస్తారనే ప్రచారం జరుగుతోంది. మరోపక్క, సుప్రీంకోర్టుని ఆశ్రయించేందుకు కూడా అచ్చెన్న తరఫు లాయర్లు ప్రయత్నిస్తున్నారట. ఏదిఏమైనా, అచ్చెన్నకు బెయిల్‌ రాకపోవడంతో టీడీపీ శ్రేణుల్లో.. మరీ ముఖ్యంగా అచ్చెన్న అనుచరుల్లో తీవ్ర ఆందోళన వ్యక్తమవుతోంది.