కరోనాతో యుద్ధమే చేస్తున్నారు.. అయినా అలసిపోవద్దు: మంత్రి ఈటెల

‘వైద్య శాఖ సిబ్బంది కరోనాతో యుద్ధ రంగంలో పోరాడుతున్నారు.. అయినా అలసిపోవద్దు’ అని తెలంగాణ వైద్యశాఖ మంత్రి ఈటెల రాజేందర్ అన్నారు. ప్రభుత్వ ఆస్పత్రుల సూపరింటెండెంట్లతో మంత్రి టెలి కాన్ఫరెన్స్‌ నిర్వహించారు. ఈ సందర్భంగా ఆయన మాట్లాడుతూ.. ‘ఇతర రాష్ట్రాల సరిహద్దుల్లోని జిల్లాల వైద్యాధికారులు అప్రమత్తంగా ఉండాలి. కరోనా మరణాలను అడ్డుకునేందుకు సమన్వయంతో పని చేయాలి. అన్ని ఆస్పత్రుల్లో పీపీఈ కిట్లు, ఎన్‌-95 మాస్కులు, లిక్విడ్‌ ఆక్సిజన్‌ సిలిండర్లు, మందులను అందుబాటులో ఉంచుకోవాలి. ఆస్పత్రుల్లో పడకల కొరత లేకుండా చూడాలి.

అవసరమైన చోట వైద్యులు, సిబ్బందిని తాత్కాలికంగా నియమించుకోవాలి. గ్రామాల్లో జ్వరం వచ్చిన ప్రతి ఒక్కరిని, ప్రతిరోజూ పరిశీలించాలి. వైద్య, ఆరోగ్య శాఖలో పనిచేస్తున్న వారి సెలవులు రద్దు చేస్తున్నాం. కేంద్ర ప్రభుత్వం ఆదేశానుసారం ఆదివారం కూడా వ్యాక్సిన్‌ వేయాలి. 45 ఏళ్లు పైబడిన వారందరినీ వాక్సిన్‌ సెంటర్‌కు పంపించాలి. ఆర్టీపీసీఆర్‌ పరీక్షల సంఖ్య పెంచాలి. కరోనాతో అవిశ్రాంతంగా పోరాడే సమయమిదని.. ప్రజా జీవనంలో జీవిస్తూనే కరోనాను నియంత్రించాలని అన్నారు.

ఈ సందర్భంగా ప్రజారోగ్య సంచాలకులు జి.శ్రీనివాసరావు మాట్లాడుతూ.. ‘ఏప్రిల్ మూడో వారం నుంచి మే చివరి వరకు కేసుల భారీగా పెరిగే అవకాశం ఉంది. ప్రస్తుతం వందల్లో నమోదవుతున్న కేసులు వేలల్లోకి వెళ్లే ప్రమాదం లేకపోలేదు. ప్రస్తుతం పాత వైర్‌సతోనే కేసులు పెరుగుతున్నాయి. దేశంలో కొత్త వైరస్ కారకాలు గుర్తించినా రాష్ట్రంలో వాటి ప్రభావం అంతగా లేదు. కానీ ప్రజల అలసత్వం వల్ల కేసుల మళ్లీ పెరుగుతున్నాయి. చాలామందిలో లక్షణాలు కనిపించకుండా వైరస్ వ్యాపిస్తోంది’.

‘కరోనా వైరస్‌ లేదని భావించడం తగదు. కరోనా కొత్త శక్తిని వృద్ధి చేసుకొని దాడి చేసేందుకు సిద్ధమవుతోంది. సెకండ్‌ వేవ్‌లో యువత సైపర్‌ స్పైడర్లుగా మారే ప్రమాదం ఎక్కువగా ఉంది. దీర్ఘకాలిక వ్యాధిగ్రస్తులు, వృద్ధులు మరింత అప్రమత్తంగా ఉండాల్సిన పరిస్థితులు ఏర్పడ్డాయి. వైర్‌సను గుర్తించేందుకు రోజూ దాదాపుగా 50వేలకు పైగా టెస్టులు చేస్తున్నాం. ఆర్‌టీపీసీఆర్‌ విధానంలో టెస్టులు చేస్తున్నాం’ అని అన్నారు.