నాగబాబు సాయం.. వాళ్ళకు ఎక్కడో కాలింది ఫాఫం.!

మంచు కుటుంబం తనను అవమానించిందంటూ ‘మంచు’ ఫ్యామిలీలో పలువురు హీరోల వద్ద హెయిర్ డ్రస్సర్‌గా పని చేసిన నాగ శ్రీను అనే ఓ వ్యక్తి మీడియాకెక్కాడు. అంతకు ముందు అతని మీద దొంగతనం కేసు పెట్టింది మంచు కుటుంబం. ఐదు లక్షల రూపాయల విలువ చేసే ‘ఎక్విప్మెంట్’ దొంగిలించాడన్నది నాగ శ్రీను మీద ‘మంచు’ కుటుంబం చేస్తున్న ఆరోపణ. అదే నిజమైతే, సీసీటీవీ ఫుటేజీ బయటకు తీయండంట నాగశ్రీను సవాల్ చేస్తున్నాడు.

సరే, తెరవెనుకాల ఏం జరిగింది.? అన్నది వేరే చర్చ. తన కుటుంబ సభ్యుల్ని దూషించారనీ, తన కులాన్ని అవమానించేలా మాట్లాడారనీ.. నాగశ్రీను వాపోతున్నాడు మీడియా ముందుకొచ్చి. కాగా, తమ కుమార్తెలు వికలాంగులనీ, చిన్నపిల్లలిద్దరూ అనారోగ్య సమస్యలతో బాధపడుతున్నారనీ నాగశ్రీను భార్య వాపోయింది.

ఈ నేపథ్యంలో సినీ నటుడు నాగబాబు, తనకు తోచిన మేర సాయం చేసేందుకు ముందుకొచ్చారు. నాగశ్రీనుని కలిసి తక్షణ ఆర్థిక సాయం కింద 50 వేల రూపాయలు అందించి, అవసరమైన వైద్య చికిత్స ఆ చిన్నారులకు చేయిస్తానని ప్రకటించారు నాగబాబు. మంచి విషయమే కదా.! ఇందులో నాగబాబుని తప్పుపట్టడానికేముంది.?

తనకు జీతం కూడా చెల్లించడంలేదని నాగశ్రీను చెప్పిన మాటల్ని నాగబాబు ప్రస్తావించడం తప్పయిపోయింది కొందరికి. మంచు కుటుంబంతో మెగా వైరానికి ఇదే నిదర్శనమంటూ కొత్త కథ అల్లుతున్నారు. సరే, మంచు కుటుంబంపై మెగా కుటుంబానికి ‘పంచాయితీ’ ఎందుకు.? అన్నది వేరే వ్యవహారం.

ప్రతి చిన్న విషయానికీ మెగా కాంపౌండ్‌ని టార్గెట్ చేయడం కొందరికి అలవాటైన వ్యవహారంగా మారిపోయింది. మెగా కుటుంబం మీద ఏదో ఒక కట్టుకథ అల్లితే, పాపులారిటీ పెరుగుతుందనుకునే వ్యక్తులు, మీడియా సంస్థల కారణంగానే ఈ దుస్థితి. ఏనుగు అలా నడిచి వెళుతోంటే, కుక్కలు మొరగడం సహజం. మెగా కుటుంబం విషయంలో కొన్ని శునకాలు ఇలాగే మొరుగుతుంటాయనుకోండి.. అది వేరే సంగతి.

ఇక్కడ నాగబాబు చేసిన మంచి పని కనిపించకుండా చేసేందుకు జరుగుతోన్న ఈ ‘మొరుగుడు’ వ్యవహారం, ఏ ‘మంచు’ భజన కోసం.? అన్నది అందరికీ అర్థమవుతూనే వుంది.