లోకేష్‌.. మీకిది తగునా?!

”ఎవ్వరూ అధైర్యపడొద్దు.. నేను అండగా ఉంటా” ఈ మాటలు గత ఆరేడు రోజులుగా తనను కలుస్తున్న పార్టీ ద్వితీయ శ్రేణి నాయకులతో తెలుగుదేశం అధినేత చంద్రబాబు పదేపదే చెబుతున్నవి. మీడియాలో ఫోటోలతోసహా ఆయన స్టేట్‌మెంట్లు చూస్తున్న తెలుగుదేశం నేతల్లో ఒకింత భరోసా కలుగుతూ ఉండొచ్చు. పార్టీ తమను వదిలేయదన్న నమ్మకం కొందరిలో ఏర్పడి ఉండొచ్చు.

అయితే, సాక్షాత్తూ చంద్రబాబుగారి పుత్రరత్నం, నిన్నమొన్నటివరకు పంచాయితీ, ఐటీశాఖలతోపాటు డిఫాక్టో సిఎంగా వ్యవహరించిన నారా లోకేష్‌ వ్యవహారశైలి అందుకు పూర్తి భిన్నంగా ఉంది. వివరాల్లోకి వెళితే..

తెలుగుదేశం అధికారంలో ఉండగా.. కన్సల్టెంట్లు పేరుతో, లైజనింగ్‌ ఆఫీసర్ల పేరుతో, పీఆర్వోల పేరుతో.. ఇంకా అనేక పదవుల్లో తమకు కావాల్సిన వ్యక్తులను తగిన అర్హతలు లేకున్నా.. అంతకుముందు పార్టీకి పనిచేశారనే కారణంగా సదరు వ్యక్తులకు కనిష్టంగా 50 వేల నుండి లక్షన్నర జీతాలపై తీసుకొని ఆ మొత్తాన్ని ప్రభుత్వ ఖజానా నుంచి చెల్లించారు.

ఐదేళ్ల కాలం సజావుగా సాగిపోయింది. లోకేష్‌ వద్ద ఓ అరడజను మంది పీఆర్వోలు, లైజనింగ్‌ ఆఫీసర్లు పని చేశారు. ప్రభుత్వం మారడంతో.. గత ప్రభుత్వం నియమించిన తాత్కాలిక ఉద్యోగులకు మే 31 వరకు మాత్రమే వారికి ప్రభుత్వ ఖజానా నుంచి చెల్లింపులు జరిగాయి. ప్రభుత్వం మారడంతో వారి ఉద్యోగాలు ఊడిపోయాయి. తనకు ఐదేళ్లు సేవలందించిన ఉద్యోగుల్లో ముగ్గురిని లోకేష్‌ పంపించేశారు. మరో ముగ్గురికి మాత్రం ”ప్రభుత్వం ఇచ్చిన జీతంలో 50% మాత్రమే ఇస్తాను.. ఉంటే ఉండండి.. లేదంటే పొండి..” అని నిక్కచ్చిగా చెప్పేశారట.

దాంతో, నిశ్చేష్టులైన సదరు ఉద్యోగులు ఏం చేయాలో పాలుపోక, మీడియా మిత్రుల వద్ద తమ ఆవేదన వ్యక్తం చేస్తున్నారు. లోకేష్‌ ఇంత నిర్దయగా వ్యవహరిస్తాడనుకోలేదు.. అంటూ లోకేష్‌ వద్ద లైజనింగ్‌ ఆఫీసర్‌గా చేసిన ఓ మహిళా జర్నలిస్ట్‌ వాపోతోంది. కొసమెరుపు ఏమిటంటే.. ఆమెను కలుసుకోవడానిక్కూడా లోకేష్‌ ఇష్టపడలేదట. తెలుగుదేశం పార్టీకి నిధుల కొరత లేదు. అందులోంచి ఉద్యోగులకు జీతాలు చెల్లించవచ్చు.

అయితే, ఇన్ఫర్మేషన్‌ డిపార్ట్‌మెంట్‌లో, ‘ఆంధ్రప్రదేశ్‌’ మాసపత్రికలో, సోషల్‌ మీడియాలో.. ఇంకా అనేక చోట్ల వందల సంఖ్యలో అస్మదీయులకు పునరావాసం కల్పించి వారికి ప్రభుత్వపరంగా భారీగా జీతాలు అందించారు. అంతమందికి ఇపుడు పార్టీ నిధుల నుండి జీతాలివ్వడం ఎలా సాధ్యం?! అయినా, అందులో చాలామందికి పని రాదు.. పునరావాసం కోసం తీసుకోవడం జరిగిందంతే.. అని తెలుగుదేశం సీనియర్‌ నేత ఒకరు తేలిగ్గా తేల్చేశారు. ఉద్యోగాలు పోయిన వారిని కలుసుకోకుండానే చంద్రబాబు, లోకేష్‌లు హైదరాబాద్‌ వెళ్లిపోవడం చర్చనీయాంశంగా మారింది.