మారటోరియం పొడిగింపు.. ఈ దోపిడీకి ఏదీ ముగింపు.?

కేంద్రం మరోమారు మారటోరియంని పొడిగించనుందట. రెండేళ్ళపాటు మారటోరియం కొనసాగించే అవకాశముందంటూ సుప్రీంకోర్టుకి కేంద్రం తెలిపింది. అంటే, దానర్థం మారటోరియం ఇప్పట్లో ముగిసే అవకాశం లేదన్నమాట. అంతా బాగానే వుందిగానీ, మారటోరియం పీరియడ్‌లో బ్యాంకులు, వినియోగదారులపై మోపుతోన్న వడ్డీ భారం మాటేమిటి.? ‘రిజర్వు బ్యాంకు నిబంధనల ప్రకారం, మారటోరియం పీరియడ్‌లో వడ్డీ వర్తిస్తుంది’ అని కేంద్రం తెలిపింది సుప్రీంకోర్టుకి. మరి, మారటోరియం వల్ల వినియోగదారుడికి కలిగే ప్రయోజనమేంటి.? అన్నది సుప్రీంకోర్టు, కేంద్రానికి వేసిన సూటి ప్రశ్న.

వడ్డీలు మాత్రమే కాదు.. ఆ వడ్డీల మీద వడ్డీలు విధిస్తూ బ్యాంకులు, వినియోగదారులకు చుక్కలు చూపించేస్తున్నాయి. క్రెడిట్‌ కార్డుల విషయంలో బ్యాంకుల తీరు మరీ దారుణంగా తయారైంది. ప్రైవేటు ఏజెన్సీలకు వసూళ్ళ బాధ్యతల్ని అప్పగించడంతో, ఆ ఏజెంట్ల నుంచి వస్తోన్న ఫోన్‌ కాల్స్‌.. వినియోగదారుల్ని మానసికంగా కుంగదీసేస్తున్నాయి.

‘లాక్‌డౌన్‌’ని అమల్లోకి తెచ్చింది కేంద్రమే. ఆ లెక్కనే, ఈ లాక్‌డౌన్‌ పీరియడ్‌లో ప్రజలు ఎదుర్కొంటున్న ఇబ్బందులకు పరిష్కారం చూపాల్సింది కూడా కేంద్రమే. ఇందులో ఇంకో మాటకు తావు లేదు. లాక్‌డౌన్‌ దెబ్బకి దేశంలో ఆర్థిక కార్యకలాపాలకు తీవ్ర ఇబ్బందులు ఏర్పడ్డాయి. సామాన్యుడి సంపాదన మీద ఈ లాక్‌డౌన్‌ తీవ్ర ప్రభావం చూపింది. ఆర్థికంగా జనం చితికిపోయారు. కఠినతరమైన లాక్‌డౌన్‌ ఎఫెక్ట్‌.. రెండు మూడేళ్ళు సామాన్యుడిపై వుంటుందని గతంలోనే ఆర్థిక రంగ నిపుణులు అంచనా వేశారు. మరి, బ్యాంకులు కూడా ఈ దిశగా ఆలోచించాలి కదా.! బ్యాంకులు ఆలోచించినా, ఆలోచించకపోయినా.. ప్రభుత్వాలు ఆ దిశగా చర్యలు తీసుకోవాలి కదా.?

‘కరోనా కట్టడికి లాక్‌డౌన్‌ విధించాం.. ఈ మారటోరియం సమస్యలతో మాకు సంబంధం లేదు’ అని కేంద్రం చేతులు దులిపేసుకోవడానికి వీల్లేదు. వందల కోట్లు, వేల కోట్లు ఎగ్గొట్టి పారిపోయిన బడా బాబుల్ని ఏమీ అనలేని బ్యాంకులు.. సామాన్యుడి నడ్డి విరిచేయడానికి మాత్రం ‘వడ్డీ’ మార్గం ఎంచుకుంటాయ్‌. ఈ దోపిడీకి ఖచ్చితంగా ఫుల్‌స్టాప్‌ పడి తీరాల్సిందే. బ్యాంకుల కంటే వడ్డీ వ్యాపారులే నయం.. అన్న పరిస్థితి రాకుండా కేంద్రమే రంగంలోకి దిగాలి. దిగుతుందా మరి.?