ఒకప్పుడు ఆయన్ని ‘మిమిక్రీ ఆర్టిస్ట్‌’ అని వెటకారం చేశారు. కానీ, అలాంటి అవమానాలకి ఆయన భయపడిపోలేదు. తానేంటో నిరూపించుకోవాలనుకున్నాడు. అందుకే, గాన గంధర్వుడయ్యాడు. పాటకు తనదైన ‘అందాన్ని’ జోడించాడాయన. పరిచయం అక్కర్లేని పేరది. గాన గంధర్వుడంటే ఎస్పీ బాలసుబ్రమణ్యం మాత్రమే. తెలుగు, తమిళ, హిందీ.. ఇలా పలు భాషల్లో వేలాది పాటలు పాడిన ఎస్పీ బాలసుబ్రమణ్యం. నటుడిగానూ.. డబ్బింగ్‌ ఆర్టిస్ట్‌గానూ, సంగీత దర్శకుడిగానూ, నిర్మాతగానూ పలు సినిమాలతో ప్రేక్షకుల్ని అలరించారు.
ఎస్పీ బాలు లేరన్న వార్తని కోట్లాది మంది భారతీయులు జీర్ణించుకోలేకపోతున్నారు. ‘మన బాలు ఇక లేడన్న వార్త నమ్మలేనిది..’ అంటూ కన్నీరు మున్నీరవుతున్నారు. ‘పాటలోని భావం చచ్చిపోతోంటే, ఆ పాట పాడలేను..’ అంటూ కొన్నాళ్ళ క్రితం ఓ ఇంటర్వ్యూలో ఎస్పీ బాలసుబ్రమణ్యం ఆవేదన వ్యక్తం చేశారు. అలా చాలా పాటలు ఆయనకు దూరమయ్యాయి.
అయితే, ఓ మంచి భావమున్న పాట మాత్రం ఆయన్ని ఎప్పుడూ వెతుక్కుంటూ వెళ్ళేది. బాలు పడితే, ఓ సాధారణమైన పాట కూడా అసాధారణమైన రీతిలో సంగీత ప్రియుల్ని అలరించేది. ఏ హీరోకి పాట పాడితే, ఆ హీరో నిజంగానే పాడినట్లుగా వుండేలా చేయడం బహుశా ఎస్పీ బాలసుబ్రమణ్యంకే చెల్లిందేమో.
ఎస్పీ బాలు పాడితే ఆ పాటలో చమక్కులుంటాయి. ప్రతి పదమూ, అందులోని ప్రతి అక్షరమూ వినేవారికి తెలుస్తుంది. అదీ బాలు ప్రత్యేకత. బుల్లితెరపై పలు మ్యూజిక్‌ కాంపిటీషన్స్‌లో పాల్గొనేవారు.. జడ్జిగా వ్యవహరించేవారు.. ఎందరో గాయకులకు పాటలు పాడటంలో మెలకువలు నేర్పించేవారు. బాలు చూపిన బాటలో.. అంటూ ఎంతోమంది మంచి గాయకులు వెండితెరకు పరిచయమయ్యారు. కానీ, బాలు ఇచ్చిన మాట తప్పారు.
కరోనా సోకిన నేపథ్యంలో ఆసుపత్రిలో చేరాక, ఓ సెల్పీ వీడియో విడుదల చేశారు బాలు. ‘పెద్దగా అనారోగ్య లక్షణాలేవీ లేవు. త్వరలోనే కోలుకుంటాను. ఇంట్లో వుండి, కుటుంబ సభ్యుల్ని ఇబ్బంది పెట్టే ఉద్దేశ్యం లేకనే ఆసుపత్రికి వచ్చాను.. అంతే తప్ప, నేను చాలా క్షేమంగా వున్నాను. కరోనా నుంచి కోలుకుని, మంచి మంచి పాటలు పాడతాను..’ అని చెప్పిన ఎస్పీ బాలు, ఆసుపత్రి నుంచి విగతజీవిగానే బయటకు రావాల్సి వచ్చింది. బాలు మరణంతో సినీ పాటల ప్రపంచం మూగబోయింది.
133304 557454How is the new year going? I hope to read far more intriguing posts like last year 306991