మే నుంచి గేర్ మారుస్తున్నాం.. పార్టీనే సుప్రీం.. 2024లో గెలవాలి: సీఎం జగన్

పార్టీనే సుప్రీం అని.. పార్టీ ఆదేశాలను ధిక్కరించిన వారికి వచ్చే ఎన్నికల్లో టికెట్లు దక్కవని వైసీపీ అధినేత, సీఎం జగన్ హెచ్చరించారు. మంత్రులు, ప్రాంతీయ కో-ఆర్డినేటర్లు, జిల్లా అధ్యక్షుల మధ్య ఇటివల మంత్రివర్గ మార్పులతో ఏర్పడ్డ విబేధాల మధ్య ఈ భేటీ ప్రాధాన్యం సంతరించుకుంది. ఆయన మాటల్లో.. ‘ఎవరూ బహిరంగ విమర్శలు చేయొద్దు. ప్రజాప్రతినిధులు వారి పని తీరు మార్చుకోవాలి. త్వరలో జిల్లా పర్యటనలు ప్రారంభిస్తాను. మే 2 నుంచి ఇంటింటికీ వైసీపీ ప్రారంభించాలి’.

‘పార్టీ బాగుంటే మనం బాగుంటాం. ప్రాంతీయ కో-ఆర్డినేటర్లు, జిల్లా అధ్యక్షులను మంత్రులు గౌరవించి కలుపుకుని వెళ్లాలి. విబేధాలున్నా మర్చిపోయి కలిసి పని చేయాలి. జిల్లా అధ్యక్షఉలను జిల్లా అభివృద్ధి మండలి చైర్మన్లుగా కేబినెట్ హోదా కల్పిస్తాం. రెండేళ్లలో ఎన్నికలకు వెళ్తున్నాం. పార్టీని మళ్లీ గెలిపించుకున్న తర్వాత జిల్లా అధ్యక్షులు మళ్లీ మంత్రులు అవుతారు.. మళ్లీ రెండున్నరేళ్ల తర్వాత పార్టీ బాధ్యతలు తీసుకుంటారు.’

‘మే నెల నుంచి పూర్తిగా గేర్ మారుస్తున్నాం. పార్టీ నేతలాం సన్నద్ధం కావాలి. మే 10 నుంచి గడప గడపకూ వైసీపీ కార్యక్రమాన్ని ప్రారంభిస్తున్నాం. ప్రతి ఎమ్మెల్యే గడప గడపకూ వెళ్లాలి. మూడేళ్లలో 95 శాతం హామీలు నెరవేర్చాం. ప్రతి ఎమ్మెల్యే నెలకు 10 సచివాలయాలు, ప్రతి సచివాలయంలో 2 రోజులు పర్యటించాలి. ఇది పూర్తి కావడానికి 8-9 నెలలు పడుతుంది. దీనివల్ల ప్రజల్లో ఎమ్మెల్యేల గ్రాఫ్ పెరుగుతుంది. సోషల్ మీడియాను విస్తృతంగా వాడుకోండి’.

‘గ్రామ స్థాయిలో కూడా సోషల్ మీడియా వారియర్లను ఉపయోగించుకోండి. జూలై 8న పార్టీ ప్లీనరీ నిర్వహిస్తాం. ఈలోపు జిల్లా కమిటీల ఎంపిక కూడా పూర్తి కావాలి. కష్టించి పని చేయకపోతే ఎన్నికల్లో టికెట్ ఉండదు. తప్పుడు ప్రచారాలను తిప్పి కొట్టండి. జూలై 8 తర్వాత మళ్లీ సమావేశం ఉంటుంది. ప్రతి మూడు నెలలకు మంత్రులు, జిల్లా అధ్యక్షులతో భేటీ ఉంటుంది’ అని అన్నారు