Chiranjeevi: ‘ఇకపై నా దృష్టంతా సినిమాలపైనే.. జీవితాంతం సినిమాల్లోనే ఉంటాన’ని మెగాస్టార్ (Mega Star) చిరంజీవి (Chiranjeevi) అన్నారు. ఇటివల ఓ కార్యక్రమంలో రాజకీయాలపై ఎదురైన ప్రశ్నకు సమాధానం ఇస్తూ.. ‘నన్ను ఇంతటివాడ్ని చేసిన ప్రజలకు మెరుగైన సేవ చేయాలనే రాజకీయాల్లోకి వచ్చాను. కానీ.. నేటి రాజకీయ పరిస్థితులు నాలాంటి వాడికి సరిపడవని తేలిపోయింది. అందుకే మళ్లీ సినిమాల్లోకి వచ్చాను. 9ఏళ్ల రాజకీయ ప్రస్థానం తర్వాత ప్రజలు ఆదరిస్తారా..? అనే నా సందేహాన్ని పటాపంచలు చేస్తూ సినిమాల్లో నా స్థానం నాదేనని ప్రజలు నిరూపించి ఆదరించార’ని అన్నారు.
సినిమా కెరీర్ పీక్స్ లో ఉన్నప్పుడే రాజకీయాల్లోకి ప్రవేశించారు చిరంజీవి. 2008లో ప్రజారాజ్యం పార్టీ స్థాపించి 2009 ఎన్నికల్లో పోటీ చేశారు. రాజకీయాల్లో ఆయనకు ప్రతికూల పరిస్థితులే ఎదురయ్యాయి. తదనంతర పరిణామాలతో 2014 ఎన్నికల అనంతరం ప్రత్యక్ష రాజకీయాలకు దూరంగానే ఉన్నారు. మళ్లీ.. తానేంటో నిరూపించుకున్న సినిమా రంగంలోకే వచ్చారు. వరుసగా సినిమాలు చేస్తున్నారు. తన స్థానం తనదేనని నిరూపిస్తూ మెగాస్టార్ గా సినిమాల్లో కొనసాగుతున్నారు.