భారత సరిహద్దులకొస్తూ ఏడ్చిన చైనా సైనికులు..

భారత్-చైనా మధ్య గత కొన్ని నెలలుగా ఉద్రిక్త పరిస్థితులు నెలకొన్న సంగతి తెలిసిందే. చర్చల పేరుతో కాలయాపన చేస్తున్న డ్రాగన్.. సరిహద్దుల్లో ఆయుధాలను, సైన్యాన్ని భారీగా మోహరిస్తోంది. భారత్ కూడా అంతే ధీటుగా సన్నద్ధమవుతోంది. బలగాల ఉపసంహరణ జరగాల్సిందేనని చర్చల్లో చెబుతున్న చైనా.. క్షేత్ర స్థాయిలో మాత్రం అందుకు విరుద్ధంగా వ్యవహరిస్తోంది. దీంతో చర్చలు ఎంతకీ ఓ కొలిక్కి రావడంలేదు.

ఇలాంటి ఉద్రిక్త పరిస్థితుల నేపథ్యంలో బస్సులో మన సరిహద్దులకు వస్తున్న చైనా సైనికులు బిగ్గరగా ఏడుస్తూ ఉన్న వీడియో ఒకటి తాజాగా వైరల్ అయింది. పీపుల్స్ లిబరేషన్ ఆర్మీ (పీఎల్ఏ) బలగాలు.. చైనా మిలటరీ పాట అయిన ‘గ్రీన్ ప్లవర్స్ ఇన్ ద ఆర్మీ‘కి శృతి కలుపుతూ బిగ్గరగా ఏడ్వటం అందులో కనిపించింది. ఈ వీడియోను తైవాన్ మీడియా ఆన్ లైన్ లో పోస్టు చేసి చైనా సైన్యాన్ని విపరీతంగా ట్రోల్ చేసింది.

భారత జవాన్లను ఎదుర్కోలేక భయంతో వారంతా బిగ్గరగా రోదిస్తున్నారంటూ ఎద్దేవా చేసింది. ఇప్పటికే లడఖ్ ఘర్షణల్లో చావుదెబ్బ తిన్న చైనా సైన్యానికి భారత సత్తా ఏంటో తెలిసిందని, దీంతో వారంతా సరిహద్దులకు వెళ్లడానికి సుముఖంగా లేరని.. అందుకే అలా ఏడుస్తున్నారంటూ వ్యాఖ్యలు చేసింది. ఈ వీడియో నెట్ లో పోస్టు చేయగానే చైనాపై సెటైర్లు వెల్లువెత్తాయి.

చైనా సరిహద్దు దేశమైన తైవాన్ కు డ్రాగన్ తో ఎప్పటినుంచో ఎడతెగని పంచాయతీ ఉంది. ఈ నేపథ్యంలో అవకాశం దొరికితే చైనాపై తైవాన్ చెలరేగిపోతుంటుంది. ఈ క్రమంలోనే చైనా సైనికుల ఏడుపు వీడియోను ట్రోల్ చేసింది. అయితే, దీనిపై చైనా అధికారిక మీడియా స్పందించింది. వారంతా యువ సైనికులని.. సరిహద్దులకు వెళ్లే ముందు తల్లిదండ్రులకు వీడ్కోలు పలికి, భావోద్వేగంతో అలా ఫీలయ్యారని వివరణ ఇచ్చింది.

సరిహద్దులకు వెళుతున్నందుకు భయంతో రోదిస్తున్నారనడంలో ఎంత మాత్రం నిజం లేదని పేర్కొంది. మొత్తానికి ఎవరి వెర్షన్ నిజమో అనే సంగతి పక్కన పెడితే ఈ వీడియో మాత్రం ఒక్కసారిగా వైరల్ గా మారింది.