ఎట్టకేలకు వెనక్కి తగ్గిన చైనా

సరిహద్దుల్లో గత కొన్ని వారాలుగా నెలకొన్న ఉద్రిక్త పరిస్థితులు తగ్గుముఖం పట్టినట్టుగా తెలుస్తోంది. ఇటీవల భారత్, చైనా జవాన్ల మధ్య ఘర్షణ జరిగిన గల్వాన్ లోయ నుంచి వెనక్కి వెళ్లడానికి చైనా అంగీకరించింది. ఈ మేరకు ఇరు దేశాల సైన్యం వివాదాస్పద ప్రాంతం నుంచి వెనక్కి వెళుతున్నాయని విశ్వసనీయ వర్గాలు వెల్లడించాయి. తూర్పు లద్దాఖ్ లోని గల్వాన్ లోయ నుంచి రెండు దేశాల సైనికులు సోమవారం కనీసం కిలోమీటర్ మేర వెనక్కి వెళ్లాయని తెలిపాయి. చైనా సైన్యం లోయలో ఏర్పాటు చేసిన తత్వాలిక టెంట్లను తొలగించి వెనక్కి వెళుతోందని పేర్కొన్నాయి. ఈ మేరకు ప్రాథమికంగా చేసిన పరిశీలనలో ధ్రువీకరణ అయిందని చెప్పాయి.

అయితే, నిజంగానే వారు వెనక్కి వెళుతున్నారా లేక ఏదైనా వ్యూహం ఉందా అనేది నిర్ధారించుకోవాల్సి ఉందని వివరించాయి. జూన్ 15 అర్ధరాత్రి గల్వాన్ లోయలో భారత్, చైనా సైనికుల మధ్య ఘర్షణ జరిగిన సంగతి తెలిసిందే. లోయలో చైనా సైనికులు వేసిన టెంటును తొలగించేందుకు వెళ్లిన భారత సైనికులను చైనా సైనికులు దొంగ దెబ్బతీశారు. ముళ్ల కంచె చుట్టిన రాడ్లు, మేకులు కొట్టని రాడ్లతో మనవాళ్లపై తెగబడటంతో 20 మంది భారత వీరులు అమరులయ్యారు. అదే సమయంలో అంతకు రెట్టింపు స్థాయిలో చైనావాళ్లను చీలిచెండాడారు. అప్పటి నుంచి రెండు దేశాల మధ్య ఉద్రిక్తతలు నెలకొన్నాయి.

సరిహద్దుల్లో పోటాపోటీగా సైన్యాన్ని, ఆయుధ సంపత్తిని మోహరించాయి. మరోవైపు ఇరు దేశాల మధ్య కమాండర్ల స్థాయిలో మూడు దఫాలపాటు చర్చలు కూడా జరిగాయి. ఈ సందర్భంగా జూన్ 22న జరిగిన చర్చల్లో గల్వాన్ లోయ నుంచి రెండు దేశాల సైనికులు కనీసం రెండు నుంచి మూడు కిలోమీటర్లు వెనక్కి వెళ్లాలని నిర్ణయానికి వచ్చాయి. కానీ నోటితో ఒకటి చెప్పి, నొసటితో మరొకటి చేసే చైనా.. ఆ మేరకు వెనక్కి వెళ్లలేదు. దీంతో సరిహద్దుల్లో ఉద్రిక్తతలు అలాగే కొనసాగాయి. ఈ నేపథ్యంలో ప్రధాని మోదీ శుక్రవారం లద్దాఖ్ లో పర్యటించి చైనా పేరెత్తకుండా ఆ దేశానికి గట్టి వార్నింగ్ ఇవ్వడం.. డ్రాగన్ వైఖరిపై అమెరికా నేరుగా ధ్వజమెత్తడం వంటి పరిణామాల నేపథ్యంలో సోమవారం చైనా సైన్యం వెనక్కి మళ్లింది.