చైనా యాప్స్ పై నిషేధం.. వాట్ నెక్స్ట్?

చైనా మన దేశ సార్వభౌమాధికారాన్ని ప్రశ్నించే విధంగా వ్యవహరిస్తున్న తరుణంలో కేంద్ర ప్రభుత్వం ఆ దేశానికి గట్టి షాకే ఇచ్చింది. చైనా పేరు ప్రస్తావించకుండానే దేశ భద్రతకు ముప్పుగా పరిణమించినవిగా పేర్కొంటూ ఆ దేశానికి చెందిన 59 యాప్స్ ను నిషేధించింది. ఇందులో మనదేశంలో ఎక్కువమంది ఉపయోగించే టిక్ టాక్ సహా పలు ప్రముఖ యాప్ లు ఉన్నాయి. యాప్ లు నిషేధించడం ద్వారా చైనాకు చెక్ చెప్పొచ్చా అనే చర్చ జరుగుతోంది. ఇది ఒక వ్యూహం మాత్రమే.

చైనాకు సంబంధించిన వస్తువులే కాదు.. యాప్ లకు కూడా భారత్ లో మాంచి గిరాకీ ఉంది. టిక్ టాక్ కు మదేశంలో కోట్లాది మంది యూజర్లు ఉన్నారు. ఏ యాప్ బ్రాండ్ వాల్యూ అయినా దానికి ఉన్న యూజర్లు, డౌన్ లోడ్లను బట్టే పెరుగుతుంది. ప్రస్తుతం భారత్ లో వాటిని నిషేధించడంతో ఆ మేరకు యూజర్లు తగ్గుతారు. ఫలితంగా వాటి బ్రాండ్ వాల్యూ కూడా తగ్గుతుంది. దీంతో ఆదాయం కూడా పడిపోతుంది. అది చైనాపై ఆర్థికంగా ప్రభావం చూపిస్తుంది.

ఇప్పటికే కరోనా వైరస్ విషయంలో ప్రపంచ దేశాలన్నీ డ్రాగన్ పట్ల రగిలిపోతున్నాయి. ఈ తరుణంలో ఆ దేశానికి చెందిన యాప్ ల వల్ల మన పౌరుల వ్యక్తిగత డేటా చోరీ అవుతుందని ఇతర దేశాలు కూడా భావించి మన బాటలోనే నిషేధిస్తే అది చైనాకు పెద్ద దెబ్బ అవుతుంది. ఇక చైనాకు చెందిన 59 యాప్ప్ నిషేధించారని తెలియగానే ఇప్పటికే వాటిని వినియోగిస్తున్న యూజర్లకు పలు సందేహాలొచ్చాయి. మన ఫోన్లలో ఉన్న ఆ యాప్ లు పని చేస్తాయా లేదా? ఇప్పటికే అందులో ఉన్న డేటా మాటేమిటి వంటి వాటిపై నెటిజన్లు గూగుల్ లో సెర్చ్ చేశారు.

ప్రస్తుతం కేంద్రం నిషేధించిన 59 యాప్ ల గురించి దేశంలోని అన్ని ఇంటర్నెట్ సర్వీస్ ప్రొవైడర్లు (ఐఎస్సీ), టెలికాం సర్వీస్ ప్రొవైడర్ల(టీఎస్పీ)లకు తెలియజేస్తారు. ఆయా యాప్ ల నుంచి వచ్చి వెళ్లే డేటాను బ్లాక్ చేయాల్సిందిగా సూచిస్తారు. ప్రస్తుతం నిషేధించిన యాప్స్ లో చాలా యాప్స్ ఇంటర్నెట్ ఆధారంగానే పనిచేస్తాయి. ఈ నేపథ్యంలో ఇంటర్నెట్ సర్వీస్ ప్రొవైడర్స్ ఆయా యాప్ ల డేటాను బ్లాక్ చేస్తే అవి ఇక పనిచేయవు. భారత్ లో ఉన్నంతసేపు అవి మనుగడలో లేనట్టే.

ఒకవేళ మనం ఇతర దేశాలకు వెళ్లినప్పుడు, అక్కడ ఈ యాప్స్ చట్టబద్ధం అయి ఉంటే, అప్పుడు పనిచేస్తాయి. కాగా, 59 యాప్స్ ని నిషేధించడంతో వాటికి ప్రత్యమ్నాయ దేశీయ యాప్స్ ఏమైనా ఉన్నాయేమోనని నెటిజన్లు తెగ వెతుకుతున్నారు. ఇప్పటికే టిక్ టాక్ కు స్వదేశీ రూపమైన చింగారీ యాప్ దూసుకుపోతుంది. చైనా యాప్స్ ని నిషేధించిన తర్వాత కొన్ని గంటల్లోనే ఏకంగా లక్ష డౌన్ లోడ్లు రావడం దీనికి నిదర్శనం. దీంతో ఈ యాప్ లో పెట్టుబడులు పెట్టడానికి పలువురు అప్పుడే ఆసక్తి ప్రదర్శిస్తున్నారని చింగారీ రూపకర్తలు చెబుతున్నారు.