దారుణం: గుంటూరులో బీటెక్ విద్యార్థిని దారుణ హత్య

గుంటూరు నగరంలో దారుణం జరిగింది. బీటెక్ చదువుతుతున్న రమ్య అనే విద్యార్దినిని నడిరోడ్డుపై కత్తితో పొడిచి దారుణంగా హత్య చేసాడు ఓ యువకుడు. హత్య చేసిన అనంతరం యువకుడు సంఘటన స్థలం నుంచి పరారయ్యాడు. స్థానిక కాకాని రోడ్డులోని పరామయకుంటలో ఈ దారుణ ఘటన జరిగింది. నల్లపు రమ్య సెయింట్ మేరీస్ కాలేజిలో బిటెక్ 3వ సంవత్సరం చదువుతోంది. విద్యార్థినిని వెంటనే ఆసుపత్రికి తరలించగా అప్పటికే మృతి చెందింది వైద్యులు నిర్ధారించారు. జిజిహెచ్ లో విద్యార్థి మృతదేహాన్ని అర్బన్ ఎస్పీ ఆరీఫ్ హఫీజ్ పరిశీలించారు. ఈ దారుణ ఘటన ఒక్కసారిగా రాష్ట్రవ్యాప్తంగా సంచలనం సృష్టించింది.

రమ్య హత్య ఘటనపై హోం శాఖ మంత్రి సుచరిత విచారం వ్యక్తం చేశారు. విద్యార్ధినిని హత్య చేయడం చాలా బాధాకరమని.. ఇది హేయమైన చర్య అని అన్నారు. జీజీహెచ్‌లో రమ్య మృతదేహాన్ని పరిశీలించిన అనంతరం హోంమంత్రి మాట్లాడుతూ.. ‘‘నిందితుడి గురించి పోలీసులు ఇప్పటికే కొన్ని ఆధారాలు సేకరించారు. నిందితుడిని ఇవాళో, రేపో పట్టుకుంటాం. విచారణ త్వరగా పూర్తి చేసి హంతకుడికి శిక్ష పడేలా చూస్తాం. రమ్య కుటుంబాన్ని ప్రభుత్వం ఆదుకుంటుంది. రమ్య ఫోన్‌ లాక్‌ ఓపెన్‌ చేస్తే సమాచారం తెలిసే అవకాశం ఉంది. ఫోన్‌ అన్‌లాక్‌ చేసేందుకు పోలీసులు ప్రయత్నిస్తున్నారు. హత్యకు ముందు యువతితో నిందితిడు ఘర్షణకు దిగినట్టు తెలుస్తోంది. మహిళలను చంపే హక్కు ఎవరికీ లేదు. ఏదైనా సమస్యలు ఉంటే మాట్లాడి పరిష్కరించుకోవాలి కానీ.. ఉన్మాదుల్లా హత్య చేయడం అత్యంత దారుణం’.

‘చట్టాలు ఎంత కఠినంగా ఉన్నా.. ఉన్మాదంతో దారుణాలకు తెగబడుతున్న ఇలాంటి ఉన్మాదులకు ఉరిశిక్షే సరైన శిక్షలా అనిపిస్తోంది. పోలీసులు పూర్తి స్థాయిలో విచారణ చేస్తున్నారు. ఈ సంఘటనపై సీఎం జగన్ కూడా తీవ్ర దిగ్భ్రాంతి వ్యక్తంచేశారు. రమ్య ఫోన్ అన్ లాక్ చేసిన తర్వాత మరింత సమాచారం తెలుస్తుంది. రమ్య కుటుంబసభ్యులను, స్నేహితులను కూడా విచారిస్తున్నాం’ అని అన్నారు.

హత్య కు గురైన రమ్య మృతదేహాన్ని మహిళా కమిషన్ ఛైర్-పర్సన్ శ్రీమతి వాసిరెడ్డి పద్మ పరిశీలించారు. స్వాత్రంత్ర దినోత్సవం రోజున ఈ దుర్ఘటన జరగడం అత్యంత బాధాకరం, దురదృష్టకరమని అన్నారు. ఘటనపై జిల్లా ఎస్పీ తో మాట్లాడారు. నిందితుడికి కఠిన శిక్ష పడే విధంగా చూస్తామని వాసిరెడ్డి పద్మ అన్నారు. రమ్య మెడపైన, పొత్తి కడుపులో ఆరు చోట్ల కత్తితో తీవ్రంగా గాయపరచడం వల్ల రమ్య వెంటనే చనిపోయిందని.. ఆమెకు పరిచయస్థుడే ఈ ఘాతుకానికి పాల్పడినట్లు తెలుస్తోందని అన్నారు.