అమరావతికి బీజేపీ మద్దతు అట.. నవ్విపోదురుగాక.!

అమరావతి పరిరక్షణ సమితి చేపట్టిన ‘న్యాయస్థానం నుంచి దేవస్థానం వరకు మహా పాదయాత్ర’కి భారతీయ జనతా పార్టీ మద్దతు తెలిపింది. మహా పాదయాత్రలో బీజేపీ నేతలు పాల్గొంటున్నారు కూడా. అమరావతికి మద్దతుగా బీజేపీ నిలబడుతుందని ఏపీ బీజేపీ అధ్యక్షుడు సోము వీర్రాజు ప్రకటించేశారు.

చిత్రమేంటంటే, ఇదే బీజేపీ హైకోర్టును కర్నూలులో పెట్టాలంటోంది. అదెలా సాధ్యం.? వైసీపీ సర్కారేమో మూడు రాజధానులంటూ, అందులో కర్నూలుని న్యాయ రాజధానిగా పేర్కొంటోంది. కర్నూలుకి హైకోర్టును తరలించాలన్నది వైసీపీ సర్కారు ఆలోచన. విశాఖకు ఎగ్జిక్యూటివ్ క్యాపిటల్ వెళుతుంది.

స్మశానం.. అలాగే ఎడారిని తలపించే అమరావతిలో (మంత్రులు ఇదే మాట చెబుతున్నారు మరి..) శాసన రాజధాని వుండిపోతుందన్నది వైఎస్ జగన్ సర్కారు ఉవాచ. ‘రాష్ట్రానికి రాజధాని ఎక్కడుండాలన్నది రాష్ట్ర ప్రభుత్వ నిర్ణయం. కేంద్రానికి ఏమీ సంబంధం లేదు..’ అని కేంద్రం ఇప్పటికే న్యాయస్థానంలో అఫిడవిట్ దాఖలు చేసింది.

కేంద్రంలో అధికారంలో వున్నది బీజేపీనే. అలాంటప్పుడు, కేంద్రం.. రాష్ట్ర ప్రభుత్వ నిర్ణయానికి (మూడు రాజధానులకు) పరోక్ష మద్ధతు పలికాక, ఇంకా ఏకైక రాజధాని అమరావతికే బీజేపీ మద్దతు అంటూ.. కమలనాథులు కొత్త కథ చెప్పడాన్ని ఏమనుకోవాలి.?

‘రాజధానిగా అమరావతే కొనసాగుతుంది. ఈ విషయమై బీజేపీ అధినాయకత్వం నుంచి స్పష్టమైన హామీ వచ్చాకనే, బీజేపీతో పొత్తు పెట్టుకున్నాం..’ అని గతంలో బీజేపీ మిత్రపక్షం జనసేన స్పష్టం చేసింది. ‘బేషరతుగా పవన్ మాతో కలిసి పనిచేసేందుకు ముందుకొచ్చారు..’ అని బీజేపీ అప్పట్లో కథలు చెప్పింది.

మరిప్పుడేమయ్యింది.? మొన్నీమధ్యన కేంద్ర మంత్రి అమిత్ షా తిరుపతికి వచ్చాక, ఏపీ బీజేపీ నేతలకు క్లాస్ పీకాక.. అమరావతి ఉద్యమానికి సంపూర్ణ మద్దతు ప్రకటించారు. కానీ, ఇది చిత్తశుద్ధితో కూడిన మద్దతు అని అనుకోవడానికి వీల్లేదు. ఇది కూడా ప్రత్యేక హోదా లాంటి నాటకమే కావొచ్చు.