పదో తరగతి పాస్ కాకున్నా.. స్విస్ లో సూపర్ గా..

కొన్ని సంఘటనలు చూస్తే చదువుకు, జీవితానికి అస్సలు సంబంధం ఉండదనిపిస్తుంది. పీహెచ్ డీలు చేసినవారు సైతం నిరుద్యోగంతో సతమతమవుతుండగా.. పట్టుమని పది కూడా చదవనివారు సూపర్ గా చక్కని జీవితం గడుపుతుంటారు. రాజస్తాన్ కు చెందిన రంజిత్ సింగ్ అనే ఆటో డ్రైవర్ కథ రెండో కోవకు చెందింది. రాజ్ కు చదువు అబ్బకపోవడంతో పదో తరగతి పాస్ కాలేదు. దీంతో జైపూర్ లో ఆటో డ్రైవర్ కమ్ టూరిస్టు గైడ్ గా స్థిరపడ్డాడు. ఇందుకోసం కొంచెం కష్టపడి ఇంగ్లిష్ నేర్చుకున్నాడు. ఈ క్రమంలో ఫ్రాన్స్ నుంచి వచ్చిన ఓ అమ్మాయి.. అతడి జీవితాన్ని ఊహించని మలుపు తిప్పింది. గైడ్ గా రాజ్ ఆమెకు జైపూర్ మొత్తం చూపించాడు. ఈ తరుణంలోనే ఆమెతో ప్రేమలో పడిపోయాడు. ఆమె కూడా రాజ్ ను ఇష్టపడింది. అనంతరం ఆమె కోసం చాలాసార్లు ఫ్రాన్స్ వెళ్లాడు. చివరకు 2014లో ఆమెను పెళ్లి చేసుకున్నాడు. ప్రస్తుతం వారికి ఓ బాబు కూడా ఉన్నాడు. అయితే, ఫ్రాన్స్ లాంగ్ వీసా కావాలంటే ఫ్రెంచ్ నేర్చుకోవాలనే నిబంధన ఉంది. దీంతో ఆ భాష కూడా నేర్చుకుని లాంగ్ టర్మ్ వీసా సాధించాడు. ప్రస్తుతం భార్యాపిల్లలతో జెనీవాలో ఉంటున్నాడు. అక్కడే ఓ రెస్టారెంట్లో ఉద్యోగం చేస్తున్నాడు. తాజాగా వంటలు నేర్పుతూ యూట్యూబ్ ఛానల్ కూడా ప్రారంభించాడు. సొంతంగా రెస్టారెంట్ ప్రారంభించే ప్రయత్నాల్లో ఉన్నాడు.