టీమిండియాకు బ్రిటన్ సడలింపులు

ఇంగ్లండ్ పర్యటనకు వెళ్లే టీమిండియా క్రికెట్ జట్టుకు బ్రిటన్ ప్రభుత్వం సడలింపులు ఇచ్చింది. ఈ విషయంలో బీసీసీఐ జరిపిన చర్యలు ఫలించాయి. ప్రయాణ ఆంక్షలు లేకుండా నేరుగా బ్రిటన్ కు చేరుకునేందుకు అక్కడి ప్రభుత్వం ఓకే చెప్పింది. ప్రస్తుతం మనదేశంలో కరోనా కేసులు చాలా ఎక్కువగా వస్తున్న సంగతి తెలిసిందే. ఈ నేపథ్యంలో పలు దేశాలు భారత్ నుంచి వచ్చే ప్రయాణికులనై ఆంక్షలు విధించాయి. బ్రిటన్ సైతం భారత్ నుంచి వచ్చే ప్రయాణికులపై ఆంక్షలు విధించింది. బ్రిటన్, ఐర్లాండ్ పౌరులు మినహా మిగిలినవారిని రానివ్వడంలేదు. అయితే, ఇంగ్లండ్ పర్యటన కోసం భారత క్రికెట్ జట్టు అక్కడ దాదాపు 3 నెలలు ఉండాలి. మహిళల జట్టు సైతం సిరీస్ ఆడనుంది.

ఈ నేపథ్యంలో బీసీసీఐ బ్రిటన్ తో చర్చలు జరిపింది. దీంతో టీమిండియా బ్రిటన్ రావడానికి ఆ దేశం అంగీకరించింది. ఈ నేపథ్యంలో జూన్ 2న టీమిండియా బ్రిటన్ బయలుదేరుతుంది. 3వ తేదీ నుంచి సౌతాంప్టన్ లో కఠిన క్వారంటైన్ లో ఉంటుంది. జూన్ 18 న్యూజిలాండ్ తో ప్రపంచ టెస్టు చాంపియన్స్ ఫైనల్ ఆడుతుంది. ఆ తర్వాత నెలరోజులు సాధన మ్యాచులు ఆడి ఇంగ్లండ్ తో వివిధ ఫార్మాట్లలో తలపడుతుంది. ఇందుకోసం బుధవారంలోపు టీమిండియా సభ్యులు ముంబై చేరుకుంటారు. 24న బయో బబుల్ లో ప్రవేశిస్తారు. సుదీర్ఘ పర్యటన కావడంతో కుటుంబ సభ్యులను తీసుకెళ్లేందుకు బీసీసీఐ అంగీకరించింది.