ఇకపై ప్లాస్మా థెరపీ ఉండదు..

కరోనా చికిత్సలో ఇప్పటివరకు చేసిన ప్లాస్మా థెరపీ ఇకపై ఉండదు. కోవిడ్ చికిత్స నుంచి దీనిని తొలగిస్తూ కేంద్ర ప్రభుత్వం నిర్ణయం తీసుకుంది. కరోనా రోగుల్లో పరిస్థితి విషమించకుండా, మరణాలు లేకుండా చూడటంలో ప్లాస్మా థెరపీ పనిచేయడంలేదని నిర్ధారణ అయిన నేపథ్యంలో ఈ నిర్ణయానికి వచ్చింది. కరోనా బారిన పడి కోలుకున్న రోగుల్లో యాంటీబాడీలు ఉంటాయి. అలాంటి వారి నుంచి ప్లాస్మాను (రక్తం నుంచి తీస్తారు) సేకరించి కరోనా ఉన్న రోగికి ఎక్కిస్తారు. దీంతో అందులో ఉండే యాంటీబాడీలు కరోనా వైరస్ పై పోరాడతాయని.. ఫలితంగా ఆ రోగి వైరస్ నుంచి బయటపడతాడని భావించారు. లక్షణాలు కనపడిన వారంలోగా, వ్యాధి తీవ్రత అంతగా లేనప్పుడు ప్లాస్మా థెరపీని వాడటానికి అనుమతించారు. అయితే, దీనివల్ల అంతగా ప్రయోజనాలు లేవని కొందరు శాస్త్రవేత్తలు స్పష్టంచేశారు. పైగా ప్లాస్మా థెరపీతో కొత్త వేరియంట్లు పుట్టుకొచ్చే ప్రమాదం ఉందని హెచ్చరించారు. ఈ నేపథ్యంలో కోవిడ్ చికిత్స నుంచి ప్లాస్మా థెరపీని తొలగించాలని భారత్ నిర్ణయించింది.