క్రైమ్ న్యూస్: గొర్రెకుంట మృత్యుబావి మిస్టరీలో మరో ట్విస్ట్.!

ఈ రోజు ఉదయమే వరంగల్ జిల్లా గీసుకొండ మండలం గొర్రెకుంట గ్రామంలో బావిలో బయటపడిన 9 మృతదేహాల మర్డర్ కి కారణమైన సంజయ్ కుమార్ యాదవ్ నిజానిజాలు ఒప్పుకోవడంతో ఈ మృత్యుబావి మిస్టరీ పూర్తిగా వీడిందని తెలిపాము. కానీ కొద్దీ సేపటి క్రితమే ఈ కేసు మరో యు టర్న్ తీసుకుంది. ఇప్పటి వరకూ బయటపడిన 9 హత్యలు అనుకోని చేసినవి కాదట.. వీటికంటే ముందు చేసిన ఓ హత్యని కప్పి పుచ్చుకోవడానికి ఈ 9 హత్యలు చేయాల్సి వచ్చిందట.

పోలీస్ కమీషనర్ రవీందర్ చెప్పిన అసలు విషయంలోకి వెళితే ‘మక్సూద్, అతని భార్య నిషా గోనె సంచుల తయారీ కంపెనీలో పనిచేసేవారు. అక్కడే పనిచేసే సంజయ్ కుమార్ యాదవ్ కి వీరిద్దరూ సాన్నిహిత్యంగా ఉండేవారు. నిషా ద్వారా తన అక్క రఫీకా(31 ఏళ్ళు)తో పరిచయం ఏర్పడింది. అప్పటికే భర్తతో విడిపోయి ముగ్గురు పిల్లల్తో ఉంటున్న రఫికా సంజయ్ మాయలో పడింది. దాంతో గీసుకొండ మండలం, జాన్ పాక ప్రాంతంలో ఒక చిన్న ఇల్లు లాంటిది తీసుకొని ఇద్దరూ సహజీవనం సాగించారు. కానీ సంజయ్ రఫికాతో కాకుండా తన పెద్ద కుమార్తెతో కూడా సాన్నిహిత్యంగా ఉండడం చూసి అతనితో రోజూ గొడవ పెట్టుకునేది. ఇదే విషయాన్ని పోలీసులకి చెబుతానని చెప్పడంతో సంజయ్ ఆమెని హతమార్చడానికి ప్లాన్ చేసాడు. తమ పెళ్లి గురించి పెద్దలతో మాట్లాడదాం అని చెప్పి రఫికాని మార్చి 8న కోల్ కతా వెళ్లడం కోసం ట్రైన్ ఎక్కించి నిడదవోలు వద్ద ట్రైన్ నుంచి తోసేసి ఆమెని చంపేశాడు. కానీ రఫికా పిల్లలు, బంధువులు కలిసి ఈ విషయాన్ని పోలీసులకి చెప్పి తనని పట్టిస్తారని భయపడి మక్సూద్ కుటుంబం మొత్తాన్ని చంపేసినట్టు సంజయ్ వాగ్మూలం ఇచ్చాడని’ తెలిపారు. మొదట 9 మంది మర్డర్స్ తో ముగిసిపోయిందని అనుకున్న మృత్యుబావి కేసు ఫైనల్ గా ఇలా 10వ మర్డర్ తో యు టర్న్ తీసుకుని కేసు ముగిసింది.