సఫారీలో సింహాన్ని తేలిగ్గా తీసుకుంటే కార్ డోర్ తీసేసింది.. ఆ తర్వాత..

తెలుగులో వచ్చిన ఆరెంజ్ సినిమాలో జెనీలియాను అడవికి తీసుకెళ్లి దగ్గరగా సింహాన్ని చూపిస్తాడు రామ్ చరణ్. దీంతో హీరోయిన్ అదిరిపోయి.. బెదిరిపోతుంది. అటువంటి సన్నివేశమే కాస్త డిఫరెంట్ గా సఫారీ రైడ్స్ కు పేరుగాంచిన సౌత్ ఆఫ్రికాలో జరిగింది. సఫారీ రైడ్ కు కారులో బయలుదేరింది ఓ కుటుంబం. విశాలమైన ప్రాంతంలో కారులో ప్రయాణిస్తూ వణ్యప్రాణుల కోసం చూస్తున్నారు. కొద్దిగా ముందుకెళ్లగానే ఓ చెట్టు నీడలో ప్రశాంతంగా సేద తీరుతున్న సింహాల గుంపు కనిపించింది. దాంతో చాలా దగ్గరగా సింహాల్ని చూస్తున్నామనే ఆనందంలో ఉండిపోయారు.

కారులో ఉన్న ఓ చిన్నారి తన ఫోన్ లో ఈ దృశ్యాన్ని చిత్రీకరిస్తోంది. తమకు దగ్గరగా వచ్చింది ఏంటో అనే ఆత్రం వచ్చిందో ఏమో.. గుంపులోని ఓ సింహం కారు దగ్గరకు వచ్చింది. కారును నిశితంగా పరిశీలించింది. సింహం దగ్గరకు వచ్చినా కారులో ఉన్నాం కదా అనే ధైర్యం ఆ ఫ్యామిలీది. సింహానికి తమకు మధ్యలో డోర్ ఉందనే భావనలో ఉండడంతో కారులో ఉన్నవారు సరదాగా ఈ దృశ్యాన్ని వీడియో తీస్తున్నారు. కానీ అకస్మాత్తుగా ఆ సింహం కారు డోర్ ను నోటితో పట్టి తెరిచేసింది. ఒక్కసారిగా ఖంగుతున్న కారులోని వారు అరుపులు మొదలెట్టేశారు. ఆ కంగారులో సింహం ఒక్క అడుగు వెనక్కు వేయడంతో కారును వెంటనే ముందుకు పోనిచ్చేశారు.

విషయమేమిటంటే సింహాన్ని చూసిన ఆనందంలో వారు కారు డోర్ లాక్ చేయడం మరచిపోయారు. ప్రస్తుతం ఈ వీడియో ఇంటర్నెట్ లో వైరల్ అవుతోంది. మొత్తానికి వారంతా ప్రాణాలతో బతికి బయటపడ్డారు. నిజానికి.. ఈ వీడియో 2014లో జరిగిన సంఘటనకు సంబంధించింది. దీనిని ఇండియన్ ఫారెస్ట్ సర్వీసెస్ ఆఫీసర్ సుశాంత్ నందా తన ట్విట్టర్ అకౌంట్ లో షేర్ చేశారు. సఫారీకి వెళ్తే జాగ్రత్త.. ఇలాంటి అనుభవాలు ఎదురుకావొచ్చు అని రాసుకొచ్చారు.