భారత్‌లో లక్షకు చేరవులో కరోనా.. తర్వాత ఏంటి.?

నిన్న భారతదేశంలో 4987 కరోనా పాజిటివ్‌ కేసులు నమోదయ్యాయి. మొత్తంగా కరోనా పాజిటివ్‌ కేసుల సంఖ్య 90 వేలు దాటేసింది. మరోపక్క, వలస కూలీలు తమ సొంత రాష్ట్రాలకు వెళుతున్న దరిమిలా, కేసుల సంఖ్య ముందు ముందు మరింత ఎక్కువగా వుండొచ్చన్న వాదనలు బలంగా విన్పిస్తున్నాయి. అంటే, ఒక్క రోజులో నమోదయ్యే కేసులు ముందు ముందు చాలా ఎక్కువ కాబోతున్నాయన్నమాట.

నిన్నటి జోరు కొనసాగితే, రేపే లక్ష మార్క్‌ని దాటేయొచ్చు దేశంలో కరోనా పాజిటివ్‌ కేసుల సంఖ్య. జూన్‌, జులై నెలల్లో ఈ వేవ్‌ మరింత ఎక్కువగా వుంటుందంటూ పలు నివేదికలు చెబుతున్నాయి. నిజానికి, దేశంలో ఒకే రోజు దాదాపు 5 వేల కేసులు నమోదవడమంటేనే అతి పెద్ద వేవ్‌గా చెప్పుకోవాలి. అలాంటది, జూన్‌ – జులైలలో మరింత పెద్ద వేవ్‌ వుండొచ్చంటే.. అది ఆషామాషీ వ్యవహారం కాదు.

తొలి 10 వేల కేసులు నమోదవడానికి ఎక్కువ సమయం పట్టింది. ఆ తర్వాత వేగం పెరిగింది. 50 వేల మార్క్‌ చేరాక.. శరవేగంగా దేశంలో కరోనా పాజిటివ్‌ కేసుల సంఖ్య పెరగడం చూశాం. మరి, లక్ష దాటాక ఏమవుతుంది.? ఇదే ఇప్పుడు సగటు భారతీయుడ్ని ఆందోళనలోకి నెట్టేస్తోంది.

క్రమంగా కేంద్రం, కరోనా వైరస్‌ కేసులకు సంబంధించి మార్గదర్శకాల్ని మారుస్తోంది. ఆసుపత్రిలో వైద్య చికిత్స అందించడం, హోవ్‌ు ఐసోలేషన్‌ విధానాల్లో మార్పులు చేస్తుండడంతో.. ఈ మార్పులు ముందు ముందు జనానికి మరింత వెతలు పెంచుతాయేమోనన్న ఆందోళన వ్యక్తమవుతోంది.

అయితే, ఇప్పుడు పెరిగిన వేవ్‌ ఎక్కువ రోజులు వుండకపోవచ్చని కేంద్రం అంచనా వేస్తుండడం కాస్త ఊరటనిచ్చే విషయమే. అయినాగానీ, కేంద్రం ఇచ్చే భరోసాని నమ్మలేని పరిస్థితి. లాక్‌డౌన్‌ సడలింపులతోపాటే, దేశంలో కరోనా పాజిటివ్‌ కేసులు, మరణాలూ పెరుగుతున్నాయ్‌ మరి. భవిష్యత్‌ ఇప్పటికైతే భయానకంగానే కన్పిస్తోంది. ముందు ముందు అది మరింత భయానకంగా మారకుండా వుండాలనే ఆశిద్దాం.. అంతకన్నా ఏం చేయగలం.?