మీడియా ‘ఇన్‌’సైట్‌: ‘లాక్‌డౌన్‌’ ముసుగులో లాక్‌ ఔట్‌!

తెలుగు మీడియా రంగంలో ‘లాక్‌ డౌన్‌’ ముసుగులో ‘లాక్‌ ఔట్‌’ చర్యలకు సంస్థల యాజమాన్యాలు యత్నిస్తున్నాయా.? ‘నేషనల్‌ అలయన్స్‌ ఆఫ్‌ జర్నలిస్ట్స్‌’ ఈ మేరకు తెలంగాణ ముఖ్యమంత్రి కల్వకుంట్ల చంద్రశేఖర్‌రావుకి రాసిన లేఖలో, మీడియా రంగంలో ప్రస్తుత పోకడల్ని ప్రస్తావించింది.

నిజానికి మీడియా సంస్థలంటే నెల రోజులకో, రెండు నెలలకో సరిపడా మాత్రమే నిధుల్ని వుంచుకుని, నడిపే సంస్థలు కావు. పదేళ్ళు, పాతికేళ్ళు.. అంతకు మించి సుదీర్ఘ కాలం పనిచేసేలా ప్రణాళికలతో మీడియా సంస్థలు ఏర్పడతాయి.

ఇప్పుడంటే మీడియా ఓ వ్యాపారంగా మారిపోయిందిగానీ, ఒకప్పుడు మీడియా ఆలోచనలు వేరు. కాలక్రమంలో మీడియాలో వచ్చిన మార్పుల్ని తప్పు పట్టలేం. కానీ, కేవలం నెలన్నర లాక్‌డౌన్‌కే మీడియా సంస్థలు, తమ ఉద్యోగులకు జీతాలు ఇవ్వలేని పరిస్థితి రావడమేంటి.? ఎక్కడో తప్పు జరుగుతోందని చిన్న పిల్లాడినడిగినా చెప్పేస్తాడు. ఇదే విషయాన్ని ‘నేషనల్‌ అలయన్స్‌ ఆఫ్‌ జర్నలిస్ట్స్‌’ కుండబద్దలుగొట్టేస్తోంది.

లాక్‌డౌన్‌ ముసుగులో టాబ్లాయిడ్స్‌, స్పెషల్‌ ఎడిషన్స్‌ని తగ్గించేశారు. ఆ ఎడిషన్లు తగ్గాయి గనుక, ఉద్యోగుల్ని ఇంటి ముఖం పట్టించేస్తున్నారు. సాధారణంగా అనుభవంతోనే జీతం పెరుగుతుంది. ఇప్పుడేమో, అనుభవజ్ఞుక్షల్ని తప్పించేయడానికి ‘లాక్‌డౌన్‌’ని వాడేసుకుని, తక్కువ జీతానికి పనిచేసేవాళ్ళని కొత్తగా నియమించుకునే ప్రక్రియ మొదలు పెడుతున్నాయి ఆయా మీడియా సంస్థలు.

ఇదిలా వుంటే, మీడియాకి కేంద్ర, రాష్ట్ర ప్రభుత్వాలు కొన్ని వెసులుబాట్లు కల్పిస్తుంటాయి. మరోపక్క, ప్రభుత్వ ప్రకటనల ద్వారా లభించే ఆదాయం సంగతి సరే సరి. ఇన్ని సానుకూలతలున్నా, కొన్ని ఇబ్బందులూ మీడియాకి వుంటే వుండొచ్చుగాక. కానీ, దీర్ఘకాల ప్రణాళికలతో మీడియా సంస్థలు స్థాపించి, ఈ కుటిల రాజకీయాలు చేయడమేంటి.? అన్నదే అసలు ప్రశ్న.

ఈనాడు, ఆంధ్రజ్యోతి సహా పలు ప్రధాన మీడియా సంస్థల్లోని బాగోతాల్ని ‘నేషనల్‌ అలయన్స్‌ ఆఫ్‌ జర్నలిస్ట్స్‌’ ముఖ్యమంత్రి దృష్టికి తీసుకెళ్ళడం గమనార్హం. మరి, ప్రభుత్వ పరంగా, బాధిత జర్నలిస్టులకు ఉపశమనం లభిస్తుందా.? అన్నది వేచి చూడాల్సిందే.