లిక్కర్ మేనియా: కరోనా కూడా సిగ్గుపడాల్సిందేనేమో.!

ఆంధ్రప్రదేశ్ మాత్రమే కాదు, దేశంలో పశ్చమ బెంగాల్ తదితర రాష్ట్రాలు నేటి నుంచి మద్యం షాపుల్ని బార్లా తెరిచాయి. ఇంకేముంది.? మద్యం షాపుల వద్ద మందు బాబులు ‘క్యూ’ కట్టేశారు. ఆంధ్రపదేశ్ విషయానికొస్తే, ఓ పెద్ద హీరో కొత్త సినిమా రిలీజ్ రోజున థియేటర్ల వద్ద పరిస్థితి ఎలా వుంటుందో.. అదే పరిస్థితి మద్యం దుకాణాల వద్ద కన్పిస్తోంది. సోషల్ డిస్టెన్స్ అన్న మాటకే తావు లేకుండా పోతోంది.

మద్యం ధరలు పెంచడంపై అభ్యంతరం వ్యక్తం చేస్తూనే, మద్యపానమే ముఖ్యం.. కరోనాతో ప్రాణం పోయినా లెక్క చేయడం.. అన్నట్లు మందుబాబులు వ్యవహరిస్తుండడం గమనార్హం. రాష్ట్రంలోని కొన్ని చోట్ల అయితే కిలో మీటర్ మేర మందు బాబులు బారులు తీరిన పరిస్థితి కూడా కన్పిస్తోంది.

కొన్ని చోట్ల క్యూలైన్లు దర్శనమిస్తోంటే.. చాలా చోట్ల సంత మార్కెట్లను తలపిస్తుండడం పరిస్థితి తీవ్రతకు అద్దం పడుతోంది. ఇంకెందుకు సోషల్ డిస్టెన్స్? ఇంకెందుకు కరోనా పేరుతో లాక్ డౌన్.? అన్న చర్చ సర్వ్రతా జరుగుతోంది. ఒక్కడు చాలు.. ఓ గ్రామం కొంప ముంచేయడానికి.. ఒక్కడు చాలు.. ఓ నగరాన్ని సర్వనాశనం చేసెయ్యడానికి.. అన్నట్లున్నాయి కరోనా పరిస్థితులు దేశంలో.

ఓ వ్యక్తి పేకాట పైత్యం 25 మందికి కరోనా వచ్చేలా చేసిందని విన్నాం. ఓ మహిళ అష్టా చెమ్మా ఆడి 30 మందికి కరోనా అంటించిందని చదువుకుంటున్నాం. మరి, మద్యం దుకాణాల వద్ద ఈ స్థాయిలో జనం బారులు తీరితే.. కరోనా ఇంకెంత చెలరేగిపోతుందట.? కనీసపాటి ఇంగితం కూడా లేకుండా ప్రభుత్వాలు కాసుల కక్కుర్తితో మద్యం దుకాణాలు తెరవడం అత్యంత హేయమనే విమర్శలు ఓపక్క విన్పిస్తోంటే.. మద్యానికి బానిసైనవాళ్ళు కల్తీ మద్యం వైపు మళ్ళుతున్నారనీ.. ఈ పరిస్థితుల్లో మద్యం దుకాణాల్ని తెరవడమే మంచిదన్నది అధికార పార్టీల వాదన.

ఎవరి వాదనలు ఎలా వున్నా, ముందు ముందు దేశంలో కరోనా మహమ్మారి చెలరేగిపోతే మాత్రం దానికి కారణం మద్యం దుకాణాల్ని తెరుస్తున్న ప్రభుత్వాలే అవుతాయి.