జనసేవ: గ్రౌండ్‌ లెవల్‌లో జనసైనికుల దూకుడు!

జనసేన శ్రేణుల్లో కొత్త ఉత్సాహం కన్పిస్తోంది. జనసేన సోషల్‌ మీడియా హ్యాండిల్స్‌ సత్తా చాటుతున్నాయి. కరోనా వైరస్‌ విషయంలో ప్రభుత్వంపై విమర్శలు చేయడంలో కాదు.. కరోనా వైరస్‌ కారణంగా ప్రజలెదుర్కొంటున్న సమస్యల్ని ప్రభుత్వం దృష్టికి తీసుకెళ్ళడంలోనూ.. జనసేన తరఫున ప్రజలకు ‘సాయం’ అందించడంలోనూ. గ్రామ స్థాయిలో ‘జనసేవ’ పేరుతో జనసైనికులు చాలా యాక్టివ్‌గా వుంటున్నారు.

అలా యాక్టివ్‌గా వ్యవహరిస్తున్నవారికి పార్టీ అధిష్టానం నుంచి ప్రశంసలు దక్కుతున్నాయి. మరీ ముఖ్యంగా జనసేన అధినేత పవన్‌ కళ్యాణ్‌, స్వయంగా ఆయా యాక్టివిటీస్‌ని తన సోషల్‌ మీడియా హ్యాండిల్‌లో ప్రస్తావిస్తున్నారు. మరోపక్క, న్యూస్‌ ఛానళ్ళ చర్చా కార్యక్రమాల్లోనూ జనసేన నేతలు హుందాగా వ్యవహరిస్తున్నారు.

గతంలో సినిమాటిక్‌గా కన్పించిన జనసైనికుల యాక్టివిటీస్‌.. ఇప్పుడు అత్యంత నిబద్ధతతో కన్పిస్తుండం గమనార్హం. కరోనా వైరస్‌ నేపథ్యంలో జనసేనాని పవన్‌ కళ్యాణ్‌, పార్టీ ముఖ్య నేతలతో నిరంతరం టచ్‌లో వుంటున్నారు. వీడియో కాన్ఫరెన్స్‌ ద్వారా పార్టీ నేతలకు దిశానిర్దేశం చేస్తున్నారు. జనసైనికులకూ తగిన సూచనలు, సలహాలు ఇస్తున్నారు. నిజానికి, మామూలు రోజుల్లో జరిగే యాక్టివిటీస్‌ కంటే, ఇప్పుడు పార్టీ యాక్టివిటీస్‌ మరింత పద్ధతి ప్రకారం నడుస్తున్నాయని గ్రౌండ్‌ లెవల్‌లో జనసైనికులూ అభిప్రాయపడ్తుండడం గమనార్హం.

కరోనా వైరస్‌ నేపథ్యంలో జనం వద్దకు ఏయే పార్టీలకు చెందిన నేతలు, కార్యకర్తలు విరివిగా వెళుతున్నారు.? అన్న విషయమై ఆరా తీస్తే, జనసైనికులే ఎక్కువ యాక్టివ్‌గా వుంటున్నారని గ్రౌండ్‌ లెవల్‌ నుంచి సమాచారం అందుతోంది. తన చేతిలో అధికారం వున్నా, వైఎస్సార్సీపీ క్యాడర్‌.. కొన్ని ప్రాంతాలకే పరిమితమవుతున్నారనీ, పైగా పబ్లిసిటీ స్టంట్స్‌ ఎక్కువైపోతున్నాయనే విమర్శలు వెల్లువెత్తుతున్నాయి. టీడీపీ క్యాడర్‌ అయితే పూర్తిగా నిస్తేజంగానే కన్పిస్తోంది.

కాగా, జనసైనికులు కరోనా వైరస్‌ పట్ల అప్రమత్తంగా వుండాలనీ, కరోనా వైరస్‌ బారిన పడకుండా వుండడంతోపాటు, ఇతరులకు కరోనా వైరస్‌ సోకేలా ఎలాంటి అత్యుత్సాహం ప్రదర్శించవద్దని సాక్షాత్తూ పవన్‌ కళ్యాణ్‌ అప్రమత్తం చేస్తున్నారు జనసైనికుల్ని. అదే సమయంలో, సోషల్‌ మీడియా వేదికగా ప్రభుత్వంపై అనవసర విమర్శలు చేయొద్దంటూ సూచిస్తుండడం గమనార్హం.