కరోనాపై ఏడు నెలల క్రితమే హెచ్చరించిన బాలమేధావి

భారతీయ సంస్కృతిలో జ్యోతిష్యం ఒక భాగం. గ్రహాల సంచారం ఆధారంగా జరగబోయే విషయాలను దీని ద్వారా జ్యోతిష్య పండితులు చెబుతుంటారు. చాలామంది దీనిని నమ్ముతారు కూడా. కొంతమంది మాత్రం జ్యోతిష్యాన్ని ట్రాష్ గా అభివర్ణిస్తుంటారు. అయితే, కొన్ని సంఘటనలు చూసినప్పుడు జ్యోతిష్యం కూడా కరెక్టే అనిపిస్తుంది.

ప్రస్తుతం ప్రపంచాన్ని తీవ్రంగా వణికిస్తున్న కరోనా వైరస్ గురించి ఏడు నెలల క్రితమే భారత్ కు చెందిన ఓ బాల జ్యోతిష్యుడు చెప్పడం విశేషం. మైసూరుకు చెందిన అభిజ్ఞా ఆనంద్ అనే 14 ఏళ్ల మేధావి తన విషయ పరిజ్ఞానంతో ఎంతో పాపులర్ అయ్యాడు. అతడు గతేడాది ఆగస్టు 22న యూట్యూబ్ లో ఒక వీడియో పోస్టు చేశాడు.

చంద్రుడు, రాహువుతో పాటు అంగారకుడు, శని, బృహస్పతి కలయిక వల్ల నవంబర్ 2019 నుంచి ఏప్రిల్ 2020 వరకు ప్రపంచంలో భారీ విపత్తు చోటుకోబోతోందని అందులో హెచ్చరించాడు. దీంతో యుద్ధం వంటిది ఏదైనా వస్తుందేమోనని కొందరు అప్పట్లో భావించారు. కానీ కరోనా వైరస్ ప్రస్తుతం ప్రపంచాన్ని కబళిస్తోంది. ఆశ్చర్యకరంగా ఇది నవంబర్ చివరి వారం నుంచే చైనాలో మొదలైంది. ప్రపంచ దేశాలన్నీ లాక్ డౌన్ పాటిస్తుండటంతో త్వరలో ఇది అదుపులోకి వస్తుందని భావిస్తున్నారు.

ఈ నేపథ్యంలో తాజాగా మూడు రోజుల క్రితం అభిజ్ఞా ఆనంద్ మరో వీడియో పోస్టు చేశాడు. ఏప్రిల్ 2వ తేదీ వరకు అత్యంత దారుణమైన పరిస్థితులు ఉండబోతున్నాయని హెచ్చరించాడు. చంద్రుడు, రాహువు కలయిక కారణంగా వైరస్ మరింత విస్తృతంగా ప్రబలే అవకాశం ఉందని పేర్కొన్నాడు.

‘గ్రహాల స్థితిగతులు ఆధారంగా ఇప్పుడు అత్యంత గడ్డు పరిస్థితులు ఉన్నాయని చెప్పగలను. అందువల్ల ఎవరూ బయటకు వెళ్లొద్దు. ఇంట్లోనే ఉంటూ ఎప్పటికప్పుడు వేడినీళ్లతో చేతులు కడుక్కుంటూ ఉండండి. అలాగే వ్యాధి నిరోధక శక్తి పెంపొందించే ఆహారం తీసుకోండి. ఈ వైరస్ ప్రభావం ఆంధ్ర, ఒడిశా, బెంగాల్, వాయువ్య భారతదేశంపై ఈ వైరస్ ప్రభావం అధికంగా ఉండనుంది. ఈ వైరస్ ఇప్పటికిప్పుడు తగ్గే అవకాశం లేదు. అయితే ఈ ఏడాది మే 29 నాటికి కాస్త తగ్గుతుంది’ అని వివరించాడు. అంటే మే 29కి దీని ప్రభావం కాస్త తగ్గే అవకాశం ఉందన్నమాట.