కరోనా వైరస్‌ (కోవిడ్‌ 19).. ఈ పాపం ఎవరిది.?

ప్రపంచంలో ఎక్కడ ఏ మూలకి వెళ్ళినా చైనా తయారీ వస్తువులు కన్పిస్తాయి. అవి అధికారికంగా విక్రయించేవి కావొచ్చు, స్మగుల్డ్‌ గూడ్స్‌ కావొచ్చు. అదే చైనా ప్రత్యేకత. ఇప్పుడు చైనా తయారీ కరోనా వైరస్‌ ‘కోవిడ్‌ 19’ దాదాపు ప్రపంచంలో అన్ని చోట్లా కన్పిస్తోంది. ప్రపంచ దేశాలన్నిటికీ ఈ కరోనా వైరస్‌ పాకేసింది. జనం పిట్టల్లా రాలిపోతున్నారు ఈ వైరస్‌ దెబ్బకి. యావత్‌ ప్రపంచం ‘లాక్‌ డౌన్‌’ స్టేజ్‌కి వచ్చేసింది.

ఇప్పుడు జరుగుతున్న నష్టం కంటే, సమీప భవిష్యత్తులో జరగబోయే నష్టమే ఎక్కువని ఆర్థిక రంగ నిపుణులు ఆందోళన వ్యక్తం చేస్తున్నారంటే పరిస్థితి తీవ్రతను అర్థం చేసుకోవచ్చు. నిజమే మరి, భవిష్యత్తులో అభివృద్ధి చెందిన దేశాలు కూడా అత్యంత దారుణంగా ఆర్థిక దుస్థితిని ఎదుర్కోవాల్సి రావొచ్చు. కంటికి కనిపించని ఓ వైరస్‌, ప్రపంచాన్ని ఇంతలా వణికించేస్తోందంటే.. ఆషామాషీ విషయం కాదు. కానీ, ఈ నేరం ఎవరిది.? ఇంత పాపం ఎవరు చేశారు.? నిస్సందేహంగా చైనానే. ‘మేం రక్కసితో పోరాడుతున్నాం..’ అని చైనా పాలకులు ప్రకటించారుగానీ, చైనా సరిహద్దుల్ని తక్షణం మూసేయలేదు.

అదే, ఇప్పుడు ప్రపంచానికి పెను శాపంగా మారింది. ఈ పాపంలో ప్రపంచ దేశాలూ భాగం పంచుకోవాల్సిందే. ఎందుకంటే, ఏ దేశమూ ఇక్కడ స్వీయ నియంత్రణ పాటించలేదు.. వైరస్‌ తమ దేశాల్లోకి వచ్చిన తర్వాత తీరిగ్గా స్పందిస్తున్నాయి.. ఇదే ప్రపంచాన్ని వైరస్‌ చుట్టేయడానికి కారణం. ఏ దేశానికి ఆ దేశం రెండు నెలల క్రితమే తమ సరిహద్దుల్ని మూసేసి వుంటే.. ఇప్పుడు ఈ దుస్థితి దాపురించేదే కాదు. కానీ, ‘మనకేమీ కాదులే..’ అన్న ఆయా దేశాల పాలకుల నిర్లక్ష్యం.. ఇప్పుడు అంచనాలకు మించిన ప్రమాదాన్ని తెచ్చిపెట్టింది.

కరోనా మరణాల్లో చైనాని దాటేసింది ఇటలీ. రేప్పొద్దున్న చాలా దేశాలు ఈ విషయంలో సరికొత్త రికార్డులు సృష్టించినా ఆశ్చర్యపోనక్కర్లేదు. అగ్ర రాజ్యం అమెరికానే చిగురుటాకులా వణకుతోంటే, ప్రపంచంలో ఏ దేశమై కరోనా మహమ్మారి నుంచి అంత తేలిగ్గా తప్పించుకోలదని భావించలేం.