కివీస్‌పై టీమిండియా మరో ‘సూపర్‌’ విక్టరీ.!

చాలా అరుదుగానే టీ20ల్లో సూపర్‌ ఓవర్‌ అవసరం ఏర్పడుతుంది. తొలి టీ20 వరల్డ్‌ కప్‌లో దాయాది పాకిస్తాన్‌ మీద సూపర్‌ ఓవర్‌ ఆడాల్సి వచ్చింది టీమిండియా.. ఆ మ్యాచ్‌లో టీమిండియా విక్టరీ సాధించిన విషయం విదితమే. చాన్నాళ్ళ తర్వాత న్యూజిలాండ్‌పై ఇటీవలే టీమిండియా మరో ‘సూపర్‌’ విక్టరీ కొట్టింది. న్యూజిలాండ్‌లో జరుగుతోన్న ఐదు మ్యాచ్‌ల టీ20 సిరీస్‌లో మూడో మ్యాచ్‌ని సూపర్‌ ఓవర్‌లో సూపర్‌ విక్టరీతో కైవసం చేసుకుని, సిరీస్‌ విజయాన్ని అందుకున్న టీమిండియా, నాలుగో టీ20లో కూడా థ్రిల్లింగ్‌ విక్టరీని.. అదీ సూపర్‌ ఓవర్‌ ద్వారానే అందుకోవడం గమనార్హం.

మూడో టీ20లో టీమిండియా 179 పరుగులు చేస్తే, దాన్ని ఛేదించే క్రమంలో ధాటిగానే ఆడిన కివీస్‌ చివర్లో చేతులెత్తేసిన విషయం విదితమే. నాలుగో టీ20లో కూడా అచ్చం అదే పరిస్థితి. 165 పరుగుల్ని టీమిండియా చేస్తే, అదే 165 పరుగులు మాత్రమే న్యూజిలాండ్‌ చేయగలిగింది. చివరి ఓవర్‌లో న్యూజిలాండ్‌ నాలుగు వికెట్లు కోల్పోయిందంటే పరిస్థితి అర్థం చేసుకోవచ్చు. సూపర్‌ ఓవర్‌ వచ్చింది.. న్యూజిలాండ్‌ తొలుత బ్యాటింగ్‌ చేసింది.. ఆరు బంతుల్లో 13 పరుగులు చేసింది. 14 బంతులు చేయాల్సిన క్రమంలో ఓపెనర్‌ రాహుల్‌ తొలి రెండు బంతులతోనే 10 పరుగులు సాధించేశాడు ఒక సిక్స్‌ ఇంకో ఫోర్‌ ద్వారా. మూడో బంతికి రాహుల్‌ ఔటయిపోయినా, అప్పటికే కివీస్‌కి డ్యామేజ్‌ జరిగిపోయింది. ఆ తర్వాత పనిని తేలిగ్గానే పూర్తి చేసేశాడు కెప్టెన్‌ విరాట్‌ కోహ్లీ.

క్రికెట్‌లో థ్రిల్లింగ్‌ విక్టరీస్‌ చాలా అరుదుగా చూస్తుంటాం. అలాంటి థ్రిల్లింగ్‌ విక్టరీస్‌.. పైగా ‘సూపర్‌’ థ్రిల్లింగ్‌ విక్టరీస్‌ బ్యాక్‌ టు బ్యాక్‌ టీమిండియా సొంతం చేసుకోవడం విశేషమే మరి. ఇక మిగిలింది ఒకే ఒక్క టీ20 న్యూజిలాండ్‌తో. ఆ మ్యాచ్‌ కూడా ఇలాగే సూపర్‌ థ్రిల్లింగ్‌ మ్యాచ్‌ అవుతుందా.? కివీస్‌ని టీమిండియా వైట్‌ వాష్‌ చేస్తుందా.? వేచి చూడాల్సిందే.