ఉల్లి.. మిర్చి.. నేడు కోడి.. ప్రజలపై సర్జికల్ దాడి..

ఎంత సంపాదించినా మూడు పూటలా ఐదు వేళ్ళు నోటిలోకి వెళ్లడం కోసమే అన్నారు మహానుభావులు. ఇప్పుడు ఎంత సంపాదించినా కడుపునిండా తినలేకపోతున్నారు. కంటినిండా నిద్రపోలేకపోతున్నారు. రోజు రోజుకు నిత్యావసర ధరలు పెరిగిపోతున్నాయి. వంటింట్లో ఉపయోగించే చిన్న చిన్న వస్తువులు సైతం ఆకాశాన్ని తాకుతున్నాయి. గతంలో టమోటా ప్రజలపై పెనుభారం మోపింది. ఒక్క టమోటా ఉంటె చాలురా భగవంతుడా అనుకునేలా చేసింది.

ఇప్పుడో టమోటాను రోడ్డుపై పారబోస్తున్నారు. గిట్టుబాటు ధరలు లేక రైతులు ఇబ్బందులు పడుతున్నారు. ట్రాన్స్ స్పోర్ట్ చార్జీలు కూడా కనీసం రావడం లేదని చెప్పి పొలాల్లో పంటను అలానే వదిలేస్తున్నారు. టమోటా ధరలు దిగొచ్చాయిలే అనుకునే లోపుగానే ఉల్లి రేటు గుండె పోటును తెప్పించింది. కిలో ధర ఏకంగా రూ. 200 వరకు చేరడంతో ప్రజలు ఉల్లిని కొనడం మానేసి ప్రత్యామ్నాయ మార్గాలను వెతుక్కున్నారు.

ఇప్పుడిప్పుడే ఉల్లి ధరలు తగ్గుముఖం పడుతున్నాయి. హమ్మయ్యా అనుకునే లోపుగానే వంటగదిలోని మరో నిత్యావసర వస్తువు ఎండు మిర్చి ఘాటు పెంచింది. కిలో రూ. 90 వరకు ఉన్న ఎండుమిర్చి ఇప్పుడు ఏకంగా మార్కెట్లో రూ. 240కి చేరుకుంది. దీంతో ఈ మిర్చిని కొనాలి అంటే భయపడిపోతున్నారు. ఎండు మిర్చిపై నుంచి వచ్చే కారం వంటివి కూడా ధరలు అమాంతం పెరిగిపోతుండటంతో ప్రజలు కన్నీరు పెడుతున్నారు.

వీటి ధరలే అనుకుంటే ఇప్పుడు మరొకటి కూడా సామాన్య ప్రజలపై సర్జికల్ స్ట్రైక్ చేస్తోంది. కాస్త ధర ఎక్కువైనా సరే ప్రతి ఒక్కరు వారంలో కనీసం రెండు మూడు సార్లు కొనుగోలు చేసే చికెన్ ధరలకు రెక్కలొచ్చాయి. బతికుండగా ఫారంలో ఎగరలేని కోళ్లు, కోసిన తరువాత ధరల రూపంలో ఆకాశంలోకి ఎగురుతున్నాయి.

దీంతో చికెన్ వైపు చూడాలంటే ప్రజలు భయపడుతున్నారు. మహేష్ బాబు ఆగడు సినిమాలో డైలాగ్ చెప్పినట్టుగా కోడి ప్రజల ముందుకు వచ్చి తొడకొడుతోంది. ఘుమఘుమలతో నోరూరించే విధంగా నోరు కట్టేసుకుని వెళ్లాల్సిన పరిస్థితి తీసుకొచ్చింది. ఇవే కాదు రాబోయే రోజుల్లో పెట్రోల్, డీజిల్, బంగారం, వెండి వంటివి కూడా భారీగా పెరిగే అవకాశం ఉన్నది. కాబట్టి ప్రజలు ఇప్పటి నుంచి అప్రమత్తం అయితే మంచిది.