ఒక్కకారు కోసమే అంత గోల చేస్తే.. 33 వేల ఎకరాలు ఇచ్చారు.. వాళ్ళెంత చేయాలి..

ఈ ఉదయం నుంచి అమరావతి పరిధిలో ఉద్రిక్తకరమైన పరిస్థితులు నెలకొన్నాయి. అమరావతి నుంచి రాజధానిని మార్చడానికి వీలు లేదని రైతులు పట్టుబడుతున్నారు. గత ప్రభుత్వం రాజధానికోసం 33 వేల ఎకరాలు రైతుల వద్దనుంచి సేకరించింది. గత ప్రభుత్వానికి వైకాపా అప్పట్లో మద్దతు తెలిపింది. 33 కనీసం 30వేల ఎకరాల్లో రాజధానిని నిర్మించాలని వైకాపా కూడా చెప్పడంతో తెలుగుదేశం పార్టీ ప్రభుత్వం రంగంలోకి దిగి రైతుల వద్ద నుంచి భూమిని సేకరించడం మొదలుపెట్టింది.

అయితే, జగన్ అధికారంలోకి వచ్చిన తరువాత ఆరు నెలలు రాజధాని విషయంపై సైలెంట్ గా ఉండి ఇప్పుడు, జగన్ మూడు రాజధానుల అంశం తెరమీదకు తీసుకురావడంతో షాక్ అయ్యారు. షాక్ కావడమే కాకుండా, ఆందోళన చేయడం మొదలు పెట్టారు. ఈ నెలాఖరులో సచివాలయాన్ని మారుస్తున్నారు అనే వార్తలు వచ్చాయి. దీంతో ఈరోజు ఉదయం నుంచి రైతులు రోడ్డు ఎక్కారు. గుంటూరు హైవైను బ్లాక్ చేశారు.

అటుగా వస్తున్న ఎమ్మెల్యే పిన్నెల్లి రామకృష్ణా రెడ్డి కారును అడ్డుకున్నారు. దీంతో పిన్నెల్లి చంద్రబాబు మాయలో పడొద్దని, జగన్ అందరికి న్యాయం చేస్తారని చెప్పినా రైతులు వినలేదు. పైగా రాళ్లతో కారుపై దాడులు చేశారు. దీంతో కారు ధ్వంసం అయ్యింది. దీనిపై ఎమ్మెల్యే ఫైర్ అయ్యాడు.

ఇలాంటి దాడులకు భయపడను… పల్నాడులో పుట్టా… ఎన్నో చూశా… టీడీపీ బెదిరింపులకు భయపడేది లేదు.. ఈ లాంటి చర్యలు మానుకోకపోతే వారికే మంచిది కాదని హెచ్చరించారు. నా కారుపై రాళ్లురువ్వినవాళ్లు అంతా మద్యంతాగి ఉన్నారని తెలిపిన పిన్నెల్లి రామకృష్ణారెడ్డి… నిజమైన రైతులైతే మద్యం తాగి కర్రలతో ఆందోళన చేస్తారా? అని ప్రశ్నించారు.

ఒక్క కారు ధ్వంసం చేసినందుకే ఇంతలా ఎగిరిపడుతున్నారే… అమరావతి రాజధాని కోసం రైతులు 33 వేల ఎకరాల భూమిని ప్రభుత్వానికి ఇచ్చిన రైతులకు ఇంకెంత కోపం ఉండాలి. పైడ్ ఆర్టిస్టులు అంటే వాళ్ళు చూస్తూ ఊరుకుంటారా చెప్పండి. తిని కూర్చునేవారు రైతులు ఎలా అవుతారు అన్నందుకు వాళ్ళెంతగా బాధపడి ఉండాలి. నేతలకేనా కోపం రైతులకు ఉండదా…? రైతుకు కోపం వస్తే ఎలా ఉంటుందో రాజధానిలో చూపిస్తున్నారు… ఇప్పటికైనా ప్రభుత్వం రాజధాని విషయంలో స్పష్టతను తెలియజేస్తే బాగుంటుంది.