నర రూప రాక్షసులు.. ఇన్నేళ్ళు బతికేశారుగానీ.!

ఔను, వాళ్ళంతా నర రూప రాక్షసులే. దేశ రాజధాని ఢిల్లీలో కొన్నేళ్ళ క్రితం అత్యంత జుగుప్సాకరమైన హత్యాచారానికి పాల్పడ్డారు. అందమైన అమ్మాయి కన్పించడంతో వారిలోని రాక్షసుడు బయటకొచ్చాడు. అంతే, ఒళ్ళు మర్చిపోయారు. అత్యంత పాశవికంగా లైంగిక దాడి జరిపారు. ఈ ఘటనలో బాధితురాలి స్నేహితుడూ తీవ్రంగా గాయపడ్డాడు. మరోపక్క, బాధిత యువతి, కొసప్రాణంతో కొట్టుమిట్టాడింది. ఆమెకి వైద్య చికిత్స అందించిన వైద్యులే తీవ్ర దిగ్భ్రాంతికి లోనయ్యారు.. ఆమె పరిస్థితిని చూసి.

తమ కెరీర్‌లోనే ఇంతటి అమానవీయ ఘటన చూడలేదని కన్నీరుమున్నీరయ్యారు వైద్యులు. ‘నిర్భయ ఘటన’గా దేశాన్ని కుదిపేసిన ఆ ఘటనలో నలుగురు దోషులకు ఎట్టకేలకు ఉరిశిక్ష అమలు కాబోతోంది. గతంలోనే నిందితులకు ఉరిశిక్షను సర్వోన్నత న్యాయస్థానం ఖరారు చేసినా, ఆ శిక్ష ఇప్పటికీ అమలు కాలేదు. తాజాగా వీరికి ఉరిశిక్ష అమలు చేయాలని న్యాయస్థానం డెత్‌ వారెంట్‌ జారీ చేసింది.

జనవరి 22న మొత్తం నలుగురూ ఉరికొయ్యకు వేలాడబోతున్నారు. దేశమంతా నలుగురి చావు కోసం కళ్ళు కాయలు కాచేలా కొన్నేళ్ళుగా ఎదురుచూస్తోందంటే, ఆ నలుగురూ చేసిన పని ఎంత రాక్షసమైనదో అర్థం చేసుకోవచ్చు. నిర్భయ ఘటన తర్వాత, నిర్భయ చట్టాన్ని తీసుకొచ్చారు పాలకులు. ఆ తర్వాత కొన్ని వందలు వేల ఘటనలు ఇలాంటివే జరిగాయి.

ఈ మధ్యనే హైద్రాబాద్‌లో దిశ ఘటన జరిగింది. మళ్ళీ దిశ చట్టం పుట్టుకొచ్చింది. చట్టాలున్నాయ్‌.. కానీ, అవి సరిగ్గా అమలు కాకపోవడమే అన్ని అనర్ధాలకీ కారణమన్నది నిర్వివాదాంశం. దిశ ఘటనలో దోషులు ఎక్కువ కాలం బతకడానికి ఆస్కారమివ్వలేదు. దాన్ని అనైతికమైన ఎన్‌కౌంటర్‌గా కొందరు అభివర్ణించొచ్చుగాక. కానీ, నిర్భయ ఘటనలో దోషులు ఇన్నేళ్ళు బతికేశారంటే, బాధితురాలి ఆత్మ శాంతిస్తుందా.? ‘ఇప్పటికైనా మా అమ్మాయి ఆత్మకు శాంతి కలుగుతుందేమో..’ అంటూ నిర్భయ తల్లిదండ్రులు, దోషులకు డెత్‌ వారెంట్‌ రావడంపై స్పందించడం గమనార్హం.