YSRCP Rebel MLAs: ఎవరా నలుగురు?

YSRCP Rebel MLAs: ఎమ్మెల్యే కోట ఎమ్మెల్సీ ఎన్నికల్లో అధికార వైఎస్ఆర్సిపి పార్టీకి ఊహించని షాక్ తగిలింది. తెలుగుదేశం పార్టీ బరిలోకి దింపిన పంచుమర్తి అనురాధ 23 ఓట్లతో అనూహ్య విజయం సాధించారు. కొద్దిరోజుల క్రితం జరిగిన పట్టభద్రుల ఎమ్మెల్సీ ఎన్నికల్లో మూడు స్థానాలు గెలుచుకున్న టిడిపికి ఈ విజయంతో కొత్త ఊపిరి వచ్చినట్లు అయింది. గురువారం ఎమ్మెల్యే కోటా ఎమ్మెల్సీ ఎన్నికల నిర్వహించగా.. శాసనసభలో టిడిపి కి ఉన్న ఎమ్మెల్యేల సంఖ్య అనుసరించి ఒక స్థానానికి గాను అనురాధను బరిలోకి దింపింది. మొత్తం ఏడు స్థానాలకు గాను ఎనిమిది మంది పోటీపడ్డారు. ఈ దశలో ఎన్నికలు ఆసక్తికరంగా మారాయి.

ఇప్పటికే పట్టభద్రుల ఎమ్మెల్సీ ఎన్నికల్లో ఘోరపరాజయాన్ని చవి చూసిన వైసీపీ ఈ ఎన్నికల్లో ఏడు స్థానాలు దక్కించుకోవాలని విశ్వ ప్రయత్నాలు చేసింది. అయితే అనూహ్యంగా టీడీపీ ఒక స్థానాన్ని గెలిచి వైసీపీ ఆశలకి గండి కొట్టింది. మొదటి ప్రాధాన్యత ఓట్లను లెక్కించగా ఐదు మంది వైసీపీ అభ్యర్థులు, టీడీపీ అభ్యర్థి ఒకరు గెలుపొందారు.

టీడీపీ అభ్యర్థి గెలవాలంటే 22 మంది ఎమ్మెల్యేల మద్దతు అవసరం కాగా ఆ పార్టీ తరపున గెలిచిన నలుగురు ఎమ్మెల్యేలు వైసీపీకి అనుకూలంగా వ్యవహరిస్తున్నారు. దీంతో టీడీపీ బలం 19 కి పడిపోయింది. ఈ దశలో వైసిపి ఏడు స్థానాలు గెలుచుకునేలా కనిపించింది. అయితే అనురాధకు 23 ఓట్లు రావడంతో ఆమెకు మద్దతిచ్చిన నలుగురు ఎమ్మెల్యేలు ఎవరా అనే విషయం చర్చనీయాంశంగా మారింది.

అయితే వెంకటగిరి ఎమ్మెల్యే ఆనం రామనారాయణ రెడ్డి, నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి గత కొన్ని రోజులుగా సొంత పార్టీపైనే విమర్శలు చేస్తున్నారు. ఈ ఇద్దరి ఓట్లు టీడీపీకి పడినట్లు భావించినా.. మరో ఇద్దరు ఎవరనే విషయం ఆసక్తి రేపుతోంది. మిగిలిన ఇద్దరూ మేకపాటి చంద్రశేఖర్ రెడ్డి, ఉండవల్లి శ్రీదేవి అయ్యుండొచ్చు అని రాజకీయ విశ్లేషకులు అభిప్రాయపడుతున్నారు.