చిరంజీవి నుంచి ఆహ్వానం.. ఆతిథ్యం..! మెగా అవకాశం పొందిన అభిమాని

అభిమాన హీరోతో ఫొటో దిగితేనే కలా.. నిజమా అనుకుంటాం. కానీ.. అభిమాన హీరో నుంచే ఆహ్వానం, అభినందనలు, ఆతిథ్యం స్వీకరిస్తే.. అంతకుమించి ఆనందం మరేదీ ఉండదు. అనకాపల్లి గవరపాలెంకు చెందిన విజయ్ కు అటువంటి అదృష్టమే దక్కింది. అభిమాన హీరో మెగాస్టార్ చిరంజీవి ఆహ్వానం అందుకుని కుటుంబంతో కలిసి ఆతిధ్యం స్వీకరించి అంతటి ఆనందమే పొందాడు. చిరంజీవిని ఆదర్శంగా తీసుకుని డ్యాన్స్ లో ప్రావీణ్యం సంపాదించాడు. భార్య జ్యోతితో కలిసి 12ఏళ్లుగా చైనాలో ఉంటూ డ్యాన్స్ మాస్టర్, యోగా గురువుగా స్థిరపడి క్లిష్టమైన ఆసనాల ద్వారా గిన్నీస్ రికార్డు సాధించారు.

రాజమౌళి జడ్జిగా పాల్గొన్న ఓ కార్యక్రమంలో విజయ్ బృందం ప్రధమస్థానం దక్కించుకుంది. బహుమతి చిరంజీవి చేతుల మీదుగా అందుకోవాల్సి ఉండగా ఆయన రాకపోవడంతో కుదరలేదు. ఇంత సాధించినా చిరంజీవిని కలవలేదనే వెలితిని, అభిమానాన్ని, ఆదర్శంగా తీసుకుని ఎదిగిన వైనాన్ని విజయ్ పలు ఇంటర్వ్యూల్లో చెప్పాడు. ఇవన్నీ చిరంజీవి దృష్టికి వెళ్లడంతో విజయ్ ను ఆహ్వానించారు. ఆ సమయానికి చైనాలో ఉండటంతో మళ్లీ ఇండియా వచ్చినప్పుడు కబురు అందింది. ఈసారి విజయ్ తన భార్య, పిల్లలు జశ్విత, శంకర్ తో కలిసి చిరంజీవిని కలిసి తన చిరకాల కోరికన నెరవేర్చుకున్నారు.

ఈ క్షణాలు జీవితంలో తాను గిన్నీస్ రికార్డు సాధించినప్పుడు కూడా పొందలేదు. చిరంజీవిని కలిస్తే చాలనుకున్నా. అటువంటిది చిరంజీవి, సురేఖ దంపతులు మాకు భోజనం పెట్టి బట్టలు పెట్టారు. మా పిల్లలను ఎత్తుకుని ఆడించారు. విలువైన విషయాలెన్నో చెప్పారు. రెండు రోజులు చిరంజీవిగారితో గడిపిన ఆనందం జీవితంలో మాకు మధుర క్షణాలు’ అని చెప్పారు విజయ్.