ఉద్యోగులున్నది మంత్రుల చెప్పులు మోయడానికేనా.?

ఓ మంత్రిగారు.. ఓ ఉద్యోగితో చెప్పులు మోయించారు.! ఔను కదా.? ఉద్యోగులున్నది చెప్పులు మోయడానికే కదా.? అంటే, ఇక మాట్లాడుకోవడానికేమీ లేదు. ఇది ప్రజాస్వామ్యం.. రాచరికం కానే కాదు. కానీ, వైసీపీ హయాంలో ప్రజాస్వామ్యానికి చోటెక్కడుంది.? అంతా రాచరికమే.!

పర్యాటక శాఖ మంత్రి రోజా, మీడియా ముందుకొస్తే నీతులు చెబుతారు.. అప్పుడప్పుడూ బూతులూ మాట్లాడతారు. రాజకీయ ప్రత్యర్థుల్ని విమర్శించే క్రమంలో చెలరేగిపోతారు. అప్పుడప్పుడూ, సభ్యత.. సంస్కారం గురించి కూడా మాట్లాడుతుంటారు.

మరి, ఇక్కడ సభ్యత.. అలాగే సంస్కారం.. ఏమైపోయాయి.? సూర్యలంక బీచ్ అభివృద్ధి నిమిత్తం పర్యాటక శాఖ మంత్రి రోజా, అధికారులతో సమీక్ష నిర్వహించారు. బీచ్‌లో కలియతిరుగుతూ, అక్కడి పరిస్థితుల గురించి అధికారుల్ని అడిగి తెలుసుకున్నారు.

బీచ్ అంటే ఇసుక కదా.. అక్కడ చెప్పులతో నడవడం కష్టంగా మారినట్టుంది. చెప్పులు తీసేశారు.. తీసేస్తూ, ఆ చెప్పులు తీసుకురావాలంటూ ఉద్యోగికి హుకూం జారీ చేశారు. మంత్రిగారు చెప్పాక చెప్పులు మోయాలి.. ఇంకేదైనా చేయాలి.. లేకపోతే ఉద్యోగం ఊడిపోతుంది.

ఏపీ టూరిజం డెవలప్మెంట్ కార్పొరేషన్ ఉద్యోగి ఆయన. ఆయన ధరించిన టీ-షర్టు కూడా అదే విషయాన్ని చెబుతోంది. ప్చ్.. ఉద్యోగికి ఎంత కష్టమొచ్చింది. నిజానికి, ఇలాంటి పనులు చేయడానికి వ్యక్తిగత సహాయ సిబ్బంది వుంటారు. వాళ్ళతో కూడా నిజానికి అలాంటి పనులు చేయించకూడదు. కానీ, చేయిస్తుంటారు.

‘ఇంకా నయ్యం.. కింది స్థాయి ఉద్యోగితో సరిపెట్టారు. ముందు ముందు.. ఉన్నతాధికారులతోనూ ఇలాంటి పనులు చేయించినా ఆశ్చర్యపోనక్కర్లేదు..’ అంటూ సోషల్ మీడియాలో సెటైర్లు పేలుతున్నాయి. ఇంతకీ ఉద్యోగ సంఘాలెక్కడ.? ఈ వ్యవహారంపై స్పందించవేం.?