పవన్ కళ్యాణ్ నాయకుడు.. అనుకున్నది సాధిస్తాడు: మెగాస్టార్ చిరంజీవి

మెగాస్టార్ చిరంజీవి ‘నిజం’ అనే టాక్ షో‌లో సందడి చేశారు. సింగర్ స్మిత ఈ టాక్ షో హోస్ట్.! మెగాస్టార్ చిరంజీవి.. అంటే, తెరచిన పుస్తకం. కానీ, ఇంకా తెలియని విషయాలు చాలానే వున్నాయ్.

కొణిదెల శివశంకర్ వరప్రసాద్ ఎలా చిరంజీవిగా మారారు.? అంటే, సినిమాల్లోకొచ్చి పేరు మార్చుకున్నారనడం చాలా తేలిక. కానీ, స్కూల్ విద్య అభ్యసిస్తున్నప్పుడే నటనపై ఆసక్తి పెరగడం దగ్గర్నుంచి, చెన్నయ్ వెళ్ళి సినిమాల్లో ప్రయత్నించడందాకా.. అక్కడి నుంచి.. సినీ రంగంలో ఎదురైన అవమానాలు, కఠిన పరిస్థితులు.. వీటిని తట్టుకుని నిలబడి, మెగాస్టార్‌గా ఎదిగేవరకూ.. మెగాస్టార్ అయ్యాక కూడా ఆ స్టార్‌డమ్‌ని ఓ బాధ్యతగా భావించి.. మరింత కష్టపడటం వరకు.. చిరంజీవి అంటే ఎవరెస్ట్ శిఖరం.!

ఔను, ఆ శిఖరాన్ని కూల్చేయడం ఇంకెవడికీ సాధ్యం కాదు. ఎందుకంటే, తనంతట తానుగా ఎదిగిన శిఖరమది. సినీ పరిశ్రమలో సక్సెస్ రేట్ చాలా తక్కువ కదా.? అనడిగితే, ‘ఔను, రెండు శాతం కావొచ్చు.. జీరో పాయింట్ టూ శాతం కావొచ్చు.. అది నాదే.. అనుకుని కష్టపడేవాళ్ళకు పరిశ్రమలో తిరుగుండదు..’ అంటూ చిరంజీవి చెప్పిన మాట.. ఓ పాఠం.. ఓ స్ఫూర్తి.

సినిమాల్లో ప్రయత్నిస్తున్న సమయంలో ‘నీ కులం ఏంటి.? అనడిగి.. ఫలానా కులం అని చెప్పగానే, అయితే కష్టం..’ అని తన ఆశలపై నీళ్ళు చల్లిన సంఘటన గురించి చెప్పినప్పుడు చిరంజీవి కళ్ళు చెమర్చాయి.

ప్రజారాజ్యం పార్టీ పెట్టి 70 లక్షల ఓట్లు సాధించిన చిరంజీవి, రాజకీయాల్లో ఎందుకు వుండలేకపోయారు.? అంటే, ‘ప్రజలు ఓట్లు వేయడానికి డబ్బులు తీసుకునే పరిస్థితి వుంది.. నేను డబ్బుతో రాజకీయాలు చేయాలనుకోలేదు.. అందుకే, ఈ రాజకీయ వ్యవస్థలో ఇమడలేకపోయాను..’ అని కుండబద్దలుగొట్టేశారు.

పవన్ కళ్యాణ్‌ని నటుగా ఇష్టపడతారా.? రాజకీయ నాయకుడిగా ఇష్టపడతారా.? అంటే, తన తమ్ముడు పవన్ కళ్యాణ్‌ని నాయకుడిగా అభివర్ణించారు. ‘పవన్ కళ్యాణ్ ఆలోచనలు వేరు. సమాజానికి ఏదైనా చేయాలన్న కసితో వుంటాడు.. చేస్తాడు, ధైర్యవంతుడు, నిలబడతాడు..’ అని చిరంజీవి చెప్పారు.

‘హీరోలకి అభిమానులుంటారు.. కానీ, పవన్ కళ్యాణ్‌కి భక్తులుంటారు.. ఆ కల్ట్ అభిమానుల లెక్కే వేరు..’ అంటూ తమ్ముడి గురించి చెబుతూ చిరంజీవి ఉప్పొంగిపోయారు.

వేదికలపై ప్రజల్ని ఉద్దేశించి ప్రసంగించడం ఇష్టమా.? వెండితెరపై నటుడిగా అలరించడం ఇష్టమా.? అనడిగితే, ‘వెండితెరపై అలరించడంలో వుండే కిక్కే వేరప్పా..’ అంటూ పవన్ కళ్యాణ్ సిగ్నేచర్ చేసి చూపించారు చిరంజీవి. ‘మీడియాకెక్కి ఎవరెవరో నా గురించి తప్పుగా మాట్లాడుతుంటారు. వాళ్ళని చూస్తే నవ్వొస్తుంది. నా ఆనందాన్ని వాడు చెడగొట్టడాని బాధపడితే.. మన ఆనందానికి అవతలి వ్యక్తిని అధిపతిని చేసినట్లవుతుంది.. అది నాకు ఇష్టం వుండదు. అందుకే, నేను వాటిని పట్టించుకోను. నా పేరు చెప్పుకుని పాపులారిటీ పెంచుకోవాలనుకునేవారిని నేనస్సలు పట్టించుకోను’ అంటూ తనదైన అభిప్రాయాన్ని చిరంజీవి కుండబద్దలుగొట్టేశారు.

తన సినిమాల్లో నెంబర్ వన్.. అని ‘ఖైదీ’ని పేర్కొన్న చిరంజీవి, అక్కినేని నాగేశ్వరరావుతో కలిసి నటించడం చాలా సరదాగా వుండేదనీ, ఎన్టీయార్‌తో కలిసి నటించినప్పుడు ప్రొఫెషనల్‌గా అనిపించిందనీ ఓ ప్రశ్నకు బదులిచ్చారు. రాధికని బెస్ట్ డాన్స్ పార్టనర్‌గా చెబుతూ, శ్రీదేవి డాన్స్ చాలా అందంగా వుంటుందని చిరంజీవి చెప్పుకొచ్చారు. విజయశాంతి నటన పవర్‌ఫుల్‌గా వుంటుందనీ, రాధిక నటన సహజంగా వుంటుందనీ వివరించారు.

కోవిడ్ కారణంగా సినీ పరిశ్రమలో కార్మికులు ఇబ్బంది పడినప్పుడు, సీసీటీ ద్వారా ఛారిటీ చేపట్టామనీ, ఈ క్రమంలో నాగార్జున, మహేష్.. ఇలా ప్రతి ఒక్కరూ సహకరించడంతో, కార్మికుల్ని ఆదుకోగలిగామనీ, అది చాలా సంతృప్తినిచ్చిందని చిరంజీవి చెప్పారు.

పవన్ కళ్యాణ్‌కి చిన్నప్పటినుంచీ గన్స్ అంటే ఇష్టమనీ, ఓ సారి గన్‌తో వెళుతోంటే రైల్వే స్టేషన్‌లో ఆపారనీ, అది డమ్మీ గన్ అని తెలిసి ఆ తర్వాత వదిలేశారనీ.. మొదటి నుంచీ రెబల్ భావాలు పవన్ కళ్యాణ్‌లో వున్నాయంటూ తమ్ముడి గురించి అన్నయ్య ఆసక్తికరమైన విషయాలు వెల్లడించారు.

‘మెగాస్టార్ అనేది ఓ బాధ్యత.. అలాగని, అది శాశ్వతం కాదు..’ అంటూ చిరంజీవి ఆసక్తికరమైన వ్యాఖ్యలు చేశారు. ‘బింబిసార’ సినిమా విషయంలో ‘మెగాస్టార్’ని కళ్యాణ్ రామ్ పేరుకి తగిలించి కొందరు పైశాచికానందం పొందిన సంగతి తెలిసిందే.