ముఖ్యమంత్రి అజ్ఞానంలో వుంటారు.! జనసేనాని సంచలన వ్యాఖ్యలు.!

‘నేను ఉద్దానం ఎప్పుడు వెళ్ళానో కూడా ప్రస్తుత ముఖ్యమంత్రి వైఎస్ జగన్ మోహన్ రెడ్డికి తెలియకపోవడం శోచనీయం. ఏమీ తెలియకుండానే ఆయన ఏవేవో మాట్లాడేస్తుంటారు నా గురించి. ఆయన అలా అజ్ఞానంలో వుంటారు. కనీసం, డిఫాక్టో ముఖ్యమంత్రి సజ్జల రామకృష్ణారెడ్డి అయినా బాధ్యతాయుతంగా వ్యవహరించాలి..’ అంటూ జనసేన అధినేత పవన్ కళ్యాణ్ సంచలన వ్యాఖ్యలు చేశారు.

తూర్పు కాపు సామాజిక వర్గ ప్రముఖులు జనసేన అధినేత పవన్ కళ్యాణ్‌ని జనసేన పార్టీ ఆంధ్రప్రదేశ్ రాష్ట్ర కార్యాలయంలో కలిశారు. తూర్పు కాపు సామాజిక వర్గానికి సంబంధించిన సమస్యలపై జనసేన అధినేతకు వినతి పత్రం అందించారు. రిజర్వేషన్లు సహా పలు అంశాల గురించి ఈ సందర్భంగా జనసేన అధినేతతో మాట్లాడారు.

‘జనసేన పార్టీ మీకు అండగా వుంటుంది. కానీ, మీరు పోరాటానికి ముందుకు రావాలి. భయపడితే ఏమీ చేయలేం. పోరాడితే పోయేదేమీ లేదు బానిస సంకెళ్ళు తప్ప. మీ సామాజిక వర్గం నుంచి బలమైన నాయకుల్ని మీరే ముందు పెట్టండి.. అప్పుడు వ్యవస్థలో మార్పులొస్తాయ్. 2024 తర్వాత ఇలాంటి సమావేశాలు జరగకూడదు.. ఎవర్నీ దేహీ అని అడిగే పరిస్థితి రాకూడదు..’ అని జనసేనాని స్పష్టం చేశారు.

‘జనసేన పార్టీకి అండగా నిలబడండి. తూర్పు కాపు సామాజిక వర్గం ఎదుర్కొంటున్న సమస్యలకు పరిష్కారం చూపిస్తాం. ఒకవేళ చూపించని పక్షంలో, నా కాలర్ పట్టుకుని నిలదీసే హక్కుని మీకు ఇప్పుడే ఇక్కడే ఇస్తున్నాను..’ అని జనసేన అధినేత ఒకింత ఉద్వేగంగా వ్యాఖ్యానించారు.

టీడీపీ హయాంలో ఒక లెక్క.. వైసీపీ హయాంలో ఒక లెక్క తూర్పు కాపు సామాజిక వర్గ జనాభా గురించి వినిపిస్తోందనీ, అంటే ఎక్కడో తేడా జరుగుతోందని జనసేనాని అనుమానం వ్యక్తం చేశారు. ‘కుల భావన ప్రతి ఒక్కరికీ వుండాలి. దానర్థం, ఇతరుల్ని కించపర్చడం కాదు. మన కులానికి మనం మేలు చేసుకోవాలి..’ అనే భావన అన్ని కులాల్లో వుండాలి.. అన్ని కులాలూ కలిసి అభివృద్ధి చెందాలనే గొప్ప ఆలోచన కూడా వుండాలని జనసేనాని చెప్పుకొచ్చారు.

‘ఉత్తరాంధ్రలో ఉద్దానం సమస్యపై గతంలోనే నేను స్పందించాను.. నేను చెయ్యగలిగింది చేశాను, చేస్తూనే వుంటాను. బహుశా ఆ విషయం వైఎస్ జగన్ మోహన్ రెడ్డికి తెలియకపోవచ్చు.. ఎందుకంటే ఆయన అజ్ఞానంలో వుంటారు.. ఆనక తెలిసీ తెలియని మాటలేవో మాట్లాడతారు..’ అంటూ ఎద్దేవా చేశారు జనసేనాని పవన్ కళ్యాణ్.