మాజీ మంత్రి నారాయణకు ముందస్తు బెయిల్.! ఆ కేసు ఇంకా వుందా.?

మాజీ మంత్రి నారాయణ ఇంకా తెలుగుదేశం పార్టీలోనే వున్నారా.? చాలామందికి వున్న డౌటానుమానం ఇది.! మొన్నీమధ్యనే పదో తరగతి పరీక్షా పత్రాల లీకేజీ కేసులో నారాయణ అరెస్టయిన విషయం విదితమే. ఇలా ఏపీ సీఐడీ ఆయన్ని అరెస్టు చేస్తే, అలా ఆయన బెయిల్ పొందారు.

తాజాగా రాజధదాని అమరావతికి సంబంధించి ఇన్నర్ రింగ్ రోడ్డు అలైన్మెంట్ అక్రమాల కేసులో మాజీ మంత్రి నారాయణ బెయిల్ పొందారు. నారాయణతోపాటు ప్రముఖ వ్యాపారవేత్త లింగమనేని రమేష్, రామకృష్ణ హౌసింగ్ సొసైటీ డైరెక్టర్ అంజనీ కుమార్ తదితరులకు ముందస్తు బెయిల్ పొందారు.

నిజానికి, రాజధాని అమరావతి ఎప్పుడో అటకెక్కింది. వైసీపీ అధికారంలోకి వస్తూనే, అమరావతిని అటకెక్కించిందిగానీ.. ఆ అమరావతి పేరుతో పబ్లిసిటీ స్టంట్లు మాత్రం కొనసాగిస్తూనే వుంది. వైసీపీ ఎమ్మెల్యే ఆళ్ళ రామకృష్ణారెడ్డికి ఈ కేసుల డ్యూటీని అప్పగించింది వైసీపీ. ఆయన నియోజకవర్గ ప్రజలకు అందుబాటులో వుండడం సంగతేమోగానీ, అధికార పార్టీ తరఫున ప్రతిపక్షం మీద కేసులేయడంలో ఎప్పుడూ బిజీగా వుంటారు.

అలా వేసిన ఓ కేసుకు సంబంధించి ఏపీ సీఐడీ దూకుడు ప్రదర్శించి, భంగపడింది. ప్రతిసారీ న్యాయస్థానంలో చుక్కెదురవుతున్నాసరే, అమరావతి పేరుతో కేసులు పెట్టడంలో మాత్రం వైసీపీ సర్కారు ‘తగ్గేదే లే’ అంటోంది. గడచిన మూడేళ్ళుగా ‘మూడు కేసులు.. ఆరు మొట్టికాయలు..’ అన్న చందాన ఎప్పటికప్పుడు అధికార వైసీపీ పరువు పోగొట్టుకుంటోంది.

ప్రభుత్వానికి ఎన్ని మొట్టికాయలు తగులుతున్నా, ‘తగ్గేదే లే’ అన్నట్టు అధికారంలో వున్నవారు వ్యవహరించడం సోషల్ మీడియా వేదికగా ఎన్ని సెటైర్లు పడుతున్నాయో ప్రత్యేకంగా చెప్పాల్సిన పనిలేదు. తాము అధికారంలో వున్నన్నాళ్ళూ విపక్షాలపై కేసులు తప్పవ్.. అదే సమయంలో ప్రభుత్వానికీ మొట్టికాయలు తప్పవ్.. అన్నట్టుంది వైసీపీ తీరు.

అమరావతి ప్రాజెక్టు అంటూ ముందుకు కదిలితే.. వైసీపీ ఆరోపిస్తున్నట్లుగా అందులో ఎక్కడన్నా లోటుపాట్లు వుంటే అవి బయటకు వస్తాయి. ప్రాజెక్టు ఆపేసి, కేసులు పెడితే.. అక్రమాలెలా బయటకు వస్తాయ్.? ఇది కదా వైసీపీ – టీడీపీ మధ్య నడుస్తున్న 60-40 ఒప్పందం.? అన్నది రాజకీయ పరిశీలకుల వాదనగా కనిపిస్తోంది.