జనసేన వ్యూహాత్మక మౌనం: అందరికీ ఆ నొప్పి తెలిసిరావాల్సిందే.!

తప్పు చేసినోళ్లకే ఆ తప్పు తెలిసి రావాలి. ఆ తప్పిదం వల్ల నష్టపోయేది తామేనని ప్రజలు తెలుసుకున్న రోజే మార్పు సాధ్యమవుతుంది. సమర్ధుడని భావించి చంద్రబాబును గద్దెనెక్కిస్తే, గ్రాఫిక్స‌్‌తో సరిపెట్టాడు. ‘ఒక్క ఛాన్స్’ అని అడిగినందుకు వైఎస్ జగన్ మోహన్ రెడ్డిని ముఖ్యమంత్రిని చేశారు. దెబ్బకు రాష్ట్రం పాతికేళ్లో, ముప్పయ్యేళ్లో వెనక్కి వెళ్లి పోయింది అభివృద్ధి పరంగా.

ఉమ్మడి మద్రాస్ రాష్ట్రం నుంచి విడిపోయినప్పుడే కాస్త బెటర్. మీ రాజధాని ఏంటీ.? అని ప్రశ్నిస్తే ‘కర్నూలు’ అని చెప్పుకున్నారు ఆంధ్రులు. తర్వాత ఉమ్మడి తెలుగు రాష్ట్రంలో ‘హైద్రాబాద్’ రాజధాని అయ్యింది. ఉమ్మడి తెలుగు రాష్ట్రం విభజనతో రాజధాని ఏది.? అన్న ప్రశ్నకు సమాధానం చెప్పుకోలేని దుస్థితి పట్టింది సీమాంధ్రులకు.

సంక్షేమం పేరుతో, ఓటు బ్యాంక్ రాజకీయాలు చేస్తూ, ‘రాజధాని’ అనే అత్యంత ప్రాథాన్యత ఉన్న అంశాన్ని తెలివిగా కాల గర్భంలో కలిపేసింది వైఎస్ జగన్ ప్రభుత్వం. సంక్షేమ పథకాలు అమలవుతున్నాయ్. కానీ, రాష్ట్రంలో రోడ్లు దెబ్బ తిన్నాయ్. గతుకుల రోడ్లలో ప్రయాణం ఎంత దారుణమో, అభివృద్ధి లేని రాష్ట్రం, రాష్ట్రం తాలూకు పయనం కూడా అంతే దుర్భరం.

విద్యార్ధులూ, రైతులూ, కార్మికులూ ఇలా ఏ వర్గమూ సంతృప్తిగా లేరు. అధికార పక్షం, ప్రతిపక్షం కలిసి ఆడుతున్న నాటకంలో రాష్ట్ర అభివృద్ధి ఊసే కనిపించడం లేదు. పాడైపోయిన రోడ్ల విషయంలో జనసేన పోరాటం చేయాలి. ఇసుక కొరత కారణంగా భవన నిర్మాణ రంగ కార్మికులు నష్టపోతే జనసేన పోరాటం చేయాలి. విద్యార్ధులు ఇబ్బందుల్ని ఎదుర్కొంటే జనసేన పోరాటం చేయాలి.

ఇలా సమస్య చిన్నదైనా, పెద్దదైనా ప్రభుత్వంపై పోరాటం.. అంటే అందరికీ జనసేన పార్టీనే గుర్తొస్తుంది. మరి ఓటేసేటప్పుడు జనసేన పార్టీ ఎందుకు గుర్తు రావడం లేదు. పోరాడి, పోరాడి అలసిపోయారని అనలేం కానీ, తాజా రాజకీయ పరిణామాల పట్ల జనసేనాని పవన్ కళ్యాణ్ వ్యూహాత్మక మౌనం పాఠిస్తున్నారు.

ప్రజలు సహకరించని పోరాటానికి అర్ధముండదు. జనసేనకు ప్రజల మద్దతు అవసరం. ఆ మద్దతు వుంటేనే జనసేన పోరాటానికి మరింత మెరుగైన ఫలితాలిస్తాయ్. టీడీపీ హయాంలో, వైఎస్ జగన్ హయాంలో దెబ్బ తిన్న ఉద్యోగులు జనసేన వైపు నిలబడగలిగితే, రాష్ట్రం బాగుపడుతుంది. ఆ రోజు ఎప్పుడొస్తుందో.!