టీడీపీకి జనసేన ఝలక్: సీఎం పదవి పవన్ కళ్యాణ్‌కి ఇచ్చేస్తారా.?

తెలుగుదేశం పార్టీ అధినేత నారా చంద్రబాబునాయుడు, జనసేన పార్టీ వైపు సంధిస్తున్న ప్రేమ బాణాలకు అటువైపు నుంచి కౌంటర్ ఎటాక్ కూడా అంతే స్థాయిలో ఎదురవుతోంది. ‘ముఖ్యమంత్రి పదవి పవన్ కళ్యాణ్‌కి వదిలేస్తారా.? అలాగైతే చెప్పండి..’ అంటూ జనసేన పార్టీ నుంచి అధికారిక ప్రకటన ఏమీ రాలేదుగానీ, సోషల్ మీడియా వేదికగా జనసేన మద్దతుదారులు మాత్రం ప్రతిపాదన పేరుతో ఝలక్ ఇస్తున్నారు.

చాలామంది జనసేన నేతల్లో కూడా ఇదే అభిప్రాయం వ్యక్తమవుతున్నా, అధినేత నిర్ణయం తీసుకునేంతవరకు ఈ విషయమై అధికారికంగా ఎవరూ మాట్లాడలేని పరిస్థితి. ‘మేం వన్ సైడ్ లవ్ చేస్తున్నాం..’ అని సాక్షాత్తూ టీడీపీ అధినేత చంద్రబాబు ఒప్పుకున్నాక, ఇంతకన్నా దిగజారుడుతనం ఇంకేముంటుంది.? టీడీపీ ఖేల్ ఖతం అయిపోయింది.. అందుకే, జనసేన మద్దతు కోసం ఇంతలా దిగజారిపోయింది.. అంటూ రాజకీయ వర్గాల్లో చర్చ జరుగుతోంది.

అయితే, ఇంకోసారి టీడీపీతో జతకట్టడం వల్ల జనసేన మరింతగా నష్టపోతుంది తప్ప, లాభపడే ప్రసక్తే లేదన్నది జనసేన శ్రేణులు చెబుతున్నమాట. అందులోనూ నిజం లేకపోలేదు. ‘శతృవుకి శతృవు మిత్రుడు అయ్యేందుకు అవకాశాలు వుండొచ్చుగానీ, అక్కడున్నది వెన్నుపోటు స్పెషలిస్ట్ చంద్రబాబు..’ అని జనసేన నేతలు అంటున్నారు.

కాగా, బీజేపీ – జనసేన మధ్య పొత్తు వుందనీ, టీడీపీతో బీజేపీగానీ, జనసేనగానీ కలిసి నడిచే అవకాశమే లేదని బీజేపీ నేతలు కుండబద్దలుగొట్టేస్తున్నారు. టీడీపీ నేతలు మాత్రం, 2024 ఎన్నికల్లో జనసేన తమతో కలిసి వస్తుందనీ, బీజేపీ కూడా కలిసొచ్చే అవకాశాలున్నాయంటున్నారు.

‘ఛీ పొమ్మంటున్నా..’ టీడీపీ నేతలు మాత్రం, జనసేన వైపూ.. బీజేపీ వైపూ చూస్తుండడం టీడీపీ ప్రస్తుతం వున్న దుస్థితిని చెప్పకనే చెబుతున్నాయి. మరోపక్క, బులుగు మీడియా ‘గోతికాడ నక్కలా’ సరైన అవకాశం కోసం ఎదురుచూస్తోంది.. జనసేన పార్టీపై బురద చల్లడం కోసం. చంద్రబాబు తానా అంటే ఇలాంటి విషయాల్లో బులుగు మీడియా తందానా అనడం వింతేమీ కాదు కదా.!