ఆఫ్గనిస్థాన్ లో భీతావాహ పరిస్థితులు..! కాబుల్ పై ఉగ్రమూకల పంజా..!!

ఆఫ్గనిస్థాన్ లో పరిస్థితులు రోజురోజుకీ తీవ్రమైపోతున్నాయి. తాలిబన్ల చేతుల్లోకి వెళ్లిపోయిన కాబుల్ లో అందరూ ఊహించినట్టే.. ఇంకాస్త ముందుగానే మారణహోమం జరిగింది. హమీద్ కర్జాయ్ అంతర్జాతీయ విమానాశ్రయం వెలుపల అబే గేటు వద్ద, సమీపంలోని బేరన్ హోటల్ వద్ద గురువారం సాయంత్రం జరిగిన ఆత్మాహుతి దాడిలో 72 మంది మృతి చెందగా.. 143 మంది తీవ్రంగా గాయపడ్డారు. చనిపోయినవారిలో అమెరికన్ మెరైన్ కమెండోలు 11 మంది, ఒక నేవీ వైద్యుడు, గాయపడినవారిలో అమెరికా సైన్యం 12 మంది ఉన్నట్టు అధికారులు వెల్లడించారు.

ఇది ఇస్లామిక్ స్టేట్ ఉగ్రవాదుల దాడేనని పెంటగాన్ తెలిపింది. పేలుళ్లు జరిగిన ప్రదేశంలో చెల్లాచెదురైన శరీరాలు, గాయాలతో రక్తమోడుతూ బాధితుల ఆర్తనాదాలతో ఆ ప్రాంతం భీతావాహంగా మారింది. ఈ దాడులు జరగడానికి ముందు విమానాశ్రయం వద్ద ఐసిస్ ఉగ్రవాదులు దాడులకు పాల్పడుతున్నారనే సమాచారాన్ని అమెరికా నా అధికారులు బైడెన్ కు సమాచారమిచ్చారు. పేలుళ్లకు గంట ముందే బ్రిటన్, అమెరికా, ఆస్ట్రేలియా.. దాడులు జరగొచ్చని హెచ్చరించాయి. ఉగ్రదాడులు జరిగే అవకాశం ఉంది.. సురక్షిత ప్రాంతాలకు వెళ్లాలనే అప్రమత్తం చేస్తున్న తరుణంలోనే ఈ పేలుళ్లు జరిగాయి.

అయితే.. ఈ దాడులను తాలిబన్ ఖండించింది. ఈనెల 31.. ఆఫ్గన్ నుంచి అమెరికా తన దళాలను ఉపసంహరించుకునే చివరి రోజు. అప్పటివరకూ ఎటువంటి దాడులు జరగవని తాలిబన్ నేతలు అభయమిచ్చినా ఈ దారుణం జరిగింది. గతంలో విదేశీ బలగాలకు సహకరించిన ఆఫ్గన్లు, అమెరికా, మిత్ర దేశాల పౌరులు దేశం వీడేందుకు విమానాశ్రయానికి ఎక్కువ సంఖ్యలో వస్తున్నారు. 31లోపు వెళ్లకుంటే తాలిబన్లు తమ అంతం చూస్తారనే భయమే ఇందుకు కారణం. అయితే.. అమెరికా, మిత్ర దేశాల పౌరులు తరలించే క్రమంలో రక్తపాతం జరగకుండా ఇది సాధ్యం కాదని బైడన్ కొద్దిరోజుల కిందటే చెప్పడం విశేషం. కాబుల్ దాడిని భారత్ తోపాటు నాటో, ఐరాస ఖండించాయి.