ఖమ్మం జిల్లాలో దారుణం.. కోతిని ఉరితీసి.. ఆపై..

జంతువుల్ని హింసించడం నేరమని ఎన్ని చట్టాలు తీసుకొచ్చినా పరిస్థితుల్లో ఏమార్పూ లేదు. ఇటివల కేరళలో గర్భంతో ఉన్న ఏనుగును పైన్ ఆపిల్ లో బాంబు పెట్టి చంపేశారు కొందరు దుండగులు. దేశం మొత్తం ఈ దారుణ సంఘటన ఎంత వైరల్ అయిందో తెలసిన విషయమే.

నేటి డిజిటల్ యుగంలో ఈ విషయం ఎంతటి మారుమూల ప్రదేశంలో ఉన్నవారికైనా ఇట్టే చేరిపోతుంది. సెల్ ఫోన్లలో ఈ విషయం అంత వైరల్ అయింది. అయినా ఖమ్మం జిల్లాలోని ఓ వ్యక్తికి ఇవేమీ పట్టనట్టుంది. ఓ కోతికి ఉరి వేసి దానిని అత్యంత దారుణంగా చంపేశాడు.

అత్యంత హేయమైన ఈ సంఘటన ఖమ్మం జిల్లా వేంసూర్ మండలం అమ్మపాలెం గ్రామం లో జరిగింది. ఓ వ్యక్తి కోతిని అతి కిరాతకంగా కర్రలతో కొట్టి ఉరి తీసి చంపాడు. ఆ కోతిని ఉరి వేసిన సమయంలో దాని మెడకు ఉచ్చు బిగుసుకుని అది ఎంత గిలగిలా కొట్టుకోవడం చూస్తుంటే ఎవరి మనసైనా కలత చెందక మానదు. కానీ ప్రత్యక్షంగా హింసిస్తున్న ఆ వ్యక్తికి.. పక్కనే చోద్యం చూస్తున్న వారిలో మాత్రం ఎటువంటి చలనం లేదు.

ప్రస్తుతం ఇంటర్నెట్ లో ఈ వీడియో వైరల్ అయింది. ఇలాంటి మానవత్వం లేని మనుషులను పోలీసులు అస్సలు విడిచి పెట్టకూడదు.. కఠినమైన చర్యలు తీసుకోవాలంటూ డిమాండ్ చేస్తున్నారు నెటిజన్లు.