ఏపీలో వ్యాక్సినేషన్: కోటి మందికి పూర్తి రక్షణ.? ఇది బులుగు ప్రచారమే.!

కరోనా మహమ్మారి నుంచి రక్షణ కలిపించేది వ్యాక్సినేషన్ మాత్రమేనని ప్రభుత్వాలు చెబుతున్నాయి. వ్యాక్సిన్ సమర్థత ఎంత.? అన్నదానిపై భిన్న వాదనలు వున్నాయనుకోండి.. అది వేరే విషయం. ఓ వైపు వ్యాక్సిన్ కొరత వేధిస్తున్నా, రాష్ట్రాలు తమ శక్తి మేర వ్యాక్సినేషన్ ప్రక్రియ చేపడుతున్నాయి. ఆంధ్రపదేశ్ రాష్ట్రంలో మొత్తంగా కోటి వ్యాక్సిన్ డోసుల్ని ఇప్పటిదాకా ప్రజలకు అందించడం జరిగింది.

రోజుకి లక్ష టీకాల్ని అందించే సామర్థ్యం వున్నా, ఆ స్థాయిలో వ్యాక్సిన్ లభ్యత లేదన్నది అందరికీ తెలిసిన విషయమే. ఇక, కోటి వ్యాక్సిన్ డోసుల్లో రెండు డోసులూ పూర్తిగా పొందినవారు దాదాపు పాతిక లక్షలు. మొదటి డోస్ పొందినవారు డెబ్భయ్ లక్షలు. మొత్తంగా కోటి డోసులన్నమాట. అంటే, ఇంకా యాభై లక్షల మందికి రెండో డోస్ ఇవ్వాల్సి వుంది. అలాంటప్పుడు, కోటి మందికి సంపూర్ణ రక్షణ.. అని బులుగు మీడియా ఎలా ప్రచారం చేయగలుగుతుంది.?

ఆ మధ్య ఓ సందర్భంలో వైసీపీ అధినేత వైఎస్ జగన్, ‘అక్కుపక్షిలో తప్పు రాస్తారు అధ్యక్షా..’ అంటూ చేసిన వ్యాఖ్యలు అప్పట్లో పెను సంచలనం. ఆ అక్కు పక్షి ఏంటన్నది ప్రత్యేకంగా చెప్పాల్సిన పనిలేదు. వ్యాక్సినేషన్ విషయమై కొన్ని ఇబ్బందులున్నా, అపశృతులు దొర్లుతున్నా, తెలంగాణతో పోల్చితే ఎక్కువ డోసుల్ని ఏపీలో వేయగలగడం గొప్ప విషయమే. జాతీయ సగటు కంటే కూడా ఆంధ్రపదేశ్ రాష్ట్రంలో వ్యాక్సినేషన్ సమర్థవంతంగా జరుగుతోంది. ఈ ఘనతు, అక్కుపక్షి రాతలు నిర్వీర్యం చేస్తున్నాయి.

ఇదిలా వుంటే, రాష్ట్రంలో మరోమారు రోజువారీ కరోనా పాజిటివ్ కేసుల సంఖ్య 10 వేలు దాటింది. నిన్న 10 వేల దిగువన.. కరోనా పాజిటివ్ కేసులు నమోదయిన విషయం విదితమే. మరణాలు మాత్రం, దాదాపుగా ప్రతిరోజూ సెంచరీ కొట్టేస్తుండడం బాధాకరం. క్రమంగా ఏపీలో పాజిటివిటీ రేటు తగ్గుతూ వస్తుండడం ఆహ్వానించదగ్గ పరిణామం.

ఇదిలా వుంటే, రాష్ట్రంలో వ్యాక్సిన్లు దొరక్క, పొరుగు రాష్ట్రాలైన తమిళనాడు, తెలంగాణ వైపు ఏపీ వాసులు చూస్తున్న వైనానికి సంబంధించి రకరకాల ప్రచారాలున్నాయి. మూడో వేవ్ త్వరలో రాబోతోందన్న ప్రచారం నేపథ్యంలో వ్యాక్సినేషన్ ప్రక్రియ మరింత జోరుగా సాగాల్సిన అవసరం వుంది. విదేశాల నుంచి వ్యాక్సిన్లను సమీకరించుకోవడంపై రాష్ట్ర ప్రభుత్వం స్పెషల్ ఫోకస్ వీలైనంత త్వరగా పెట్టాల్సి వుంది.