తెలంగాణ: మరో 6 ప్రైవేటు ఆసుపత్రులకు కోవిడ్ అనుమతులు రద్దు..

కోవిడ్ ట్రీట్‌మెంట్ పేరుతో అధిక ఫీజులు వసూలు చేస్తున్న ప్రైవేటు ఆసుపత్రులపై తెలంగాణ ప్రభుత్వం చర్యలు తీసుకుంటున్న సంగతి తెలిసిందే. నిన్న ఆరు ఆసుపత్రులకు అనమతులు రద్దు చేసిన ప్రభుత్వం ఈరోజు మరో ఆరు ఆసుపత్రులకు అనుమతులు రద్దు చేసింది. సికింద్రాబాద్ లోని కిమ్స్, గచ్చిబౌలిలోని సన్ షైన్, బంజారాహిల్స్ లోని సెంచరీ, లకడీకాపూల్ లోని లోటస్, ఎల్ బీ నగర్ లోని మెడిసిన్, టోలిచౌక్ లోని ఇంటెగ్రో ఆసుపత్రులకు కోవిడ్ లైసెన్స్ రద్దు చేసింది.

ఈమేరకు రాష్ట్ర వైద్యారోగ్య శాఖ ఓ ప్రకటనలో తెలిపింది. ఈ ఆసుపత్రుల్లో కొత్తగా కోవిడ్ రోగులను చేర్చుకునేందుకు వీల్లేదని ఉత్తర్వుల్లో స్పష్టం చేసింది. ఇప్పటికే ఆసుపత్రుల్లో చికిత్స పొందుతున్న వారికి మాత్రం నిబంధనల మేరకు చికిత్స చేయాలని ఆదేశించింది. ఈ ఆదేశాలను పాటించకపోతే ఆసుపత్రి లైసెన్సులను రద్దు చేస్తామని తెలిపింది. కొన్ని ప్రభుత్వాసుపత్రులు రోజుకు లక్ష చొప్పున వసూలు చేస్తున్నట్టు వస్తున్న ఆరోపణలపై ప్రభుత్వం స్పందించింది.