వైసీపీకి వేరే శత్రువులు అవసరం లేదు సుమీ.!

రోజురోజుకీ ఆంధ్రప్రదేశ్‌లో రాజకీయం అత్యంత వికారంగా తయారవుతోంది. నేరాలు జరుగుతున్నాయ్.. దారుణాలు చోటు చేసుకుంటున్నాయ్.! వీటిపై హోంమంత్రి మాట్లాడుతూ, ‘అవి జరుగుతూనే వుంటాయ్..’ అని సెలవిస్తున్నారు. ‘అబ్బే, అత్యాచారం చేయడానికి వెళ్ళలేదు.. డబ్బులు దోచుకుందామనుకున్నారు.. కానీ, అత్యాచారం జరిగిపోయిందంతే..’ అని సాక్షాత్తూ హోంమంత్రి చెప్పడం రాష్ట్రం ఇప్పుడెదుర్కొంటున్న దయనీయ స్థితిని చెప్పకనే చెబుతున్నాయ్.

‘ఇదంతా విపక్షాల కుట్ర.. దుష్ట చతుష్టయం చేస్తోన్న దుర్మార్గం.. మంచి పాలన అందిస్తోంటే ఓర్వలేనితనం..’ అంటూ ముఖ్యమంత్రి ఎంతగా నెపాన్ని రాజకీయ ప్రత్యర్థుల మీదకు నెట్టేస్తున్నా, రాష్ట్రానికి జరగకూడని అన్యాయమే జరిగిపోతోంది. ‘బటన్ నొక్కి నేరుగా..’ అంటూ ముఖ్యమంత్రి వైఎస్ జగన్ మోహన్ రెడ్డి పబ్లిసిటీ స్టంట్లు చేస్తున్నారు.

నిజమే, ముఖ్యమంత్రి బటన్ నొక్కుతున్నారు.. నిధులు విడుదలవుతున్నాయ్. కానీ, అవి ఎక్కడికి చేరుతున్నాయన్నదే కీలకం. ఎక్కడి నుంచి ఎక్కడికి వెళుతున్నాయ్.. తిరిగి అది ప్రభుత్వానికి ఆదాయ వనరుగా ఎలా మారుతోంది.? ప్రభుత్వంలో వున్నవారికి అదెలా మేలు చేస్తోంది.? ఇలాంటి అంశాలపై జనం ఆలోచించుకోకుండా వుంటారా.?

రాష్ట్రంలో అభివృద్ధి ఊసు లేదు. కానీ, సంక్షేమం కోసం బటన్ నొక్కేస్తున్నారు. ఉద్యోగుల జీతాలకు కూడా అలాటే ఠంచనుగా బటన్ నొక్కితే పోలా.? అంటూ జనసేన పార్టీ సంధిస్తున్న ప్రశ్నకు వైసీపీ నుంచి సమాధానమే దొరకడంలేదు. ఏమన్నా అంటే, పవన్ కళ్యాణ్ నాలుగు పెళ్ళిళ్ళు చేసుకున్నారంటూ మంత్రులు, పనికిమాలిన పురాణాన్ని తెరపైకి తెస్తారు.

మూడేళ్ళవుతోంది కదా అధికారంలోకి వచ్చి.. ఇంతకీ, రాష్ట్రానికి రాజధాని ఏది.? అంటే సమాధానం చెప్పలేని దుస్థితి వైసీపీది. అందుకే, ముఖ్యమంత్రి మీటింగుల నుంచి జనం పారిపోతున్నారు. ప్రతిదానికీ విపక్షాల మీదకు తోసేస్తే జనం మాత్రం ఎలా జీర్ణించుకోగలరు.? వైసీపీకి వేరే శతృవు అవసరం లేదు. ముఖ్యమంత్రి సహా వైసీపీ నేతల్లో పెరిగిపోతున్న అసహనమే వైసీపీ కొంప ముంచేయనుంది.