అమరావతికి వైసీపీ ఫ్రీ పబ్లిసిటీ.! వైఎస్ జగన్‌ని నిండా ముంచేస్తున్నారే.!

ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డికి అర్థమవుతుందో లేదోగానీ.. వైసీపీ ముఖ్య నేతలు, అందునా మంత్రులు సైతం, రాజధాని అమరావతికి ఫ్రీ పబ్లిసిటీ ఇచ్చేస్తున్నారు. పాజిటివ్ పబ్లిసిటీ అయినా, నెగెటివ్ పబ్లిసిటీ అయినా.. పబ్లిసిటీ అంటే పబ్లిసిటీనే.! ఒకరకంగా నెగెటివ్ పబ్లిసిటీనే ఈ మధ్య బాగా వర్కువట్ అవుతోంది.

‘సర్కారు వారి పాట’ సినిమాకి తొలి రోజు విపరీతమైన నెగెటివిటీ వచ్చింది.. కానీ, ఆ సినిమా నిలబడింది. ఆ నెగెటివ్ పబ్లిసిటీ వల్లనే, మహేష్ అభిమానుల్లో ‘కసి’ పెరిగింది.. సినిమాని హిట్ చేసి పడేశారు. ‘బ్రహ్మాస్త్ర’ సినిమా విషయంలోనూ అదే జరుగుతోంది. నార్త్ ఆడియన్స్ ఇప్పుడీ సినిమాని సీరియస్‌గా తీసుకున్నారు.

అమరావతి విషయంలోనూ అదే జరుగుతుందా.? అంటే, అదే జరిగే అవకాశాలెక్కువగా వున్నాయి. అమరావతి రైతుల పాదయాత్రని అసమర్థుల శవ యాత్ర.. అంటూ వైసీపీ నేతలు కొందరు ఎద్దేవా చేస్తున్నారు. అత్యంత జుగు్సాకరమైన వ్యాఖ్యలు కొందరు మంత్రులు, కీలక పదవుల్లో వున్న నాయకులు చేస్తున్న విషయం విదితమే.

అసలంటూ పాదయాత్రకు ప్రభుత్వం అనుమతిచ్చేసి వుంటే, ఆ పాదయాత్రని ఎవరూ పట్టించుకునేవారే కాదు. రాష్ట్రంలో సవాలక్ష సమస్యలున్నాయ్.. అందులో అమరావతి ఒకటి. ప్రత్యేక హోదా గురించి మాట్లాడుతున్నారా.? రైల్వే జోన్ గురించి గొంతు విప్పుతున్నారా.? నాశనమైన రోడ్ల గురించి నినదిస్తున్నారా.? ప్రైవేటు పరం కానున్న విశాఖ స్టీల్ ప్లాంట్ గురించి ఆవేదన వ్యక్తం చేస్తున్నారా.? అసలు ఆంధ్రప్రదేశ్ ప్రజలు దేని గురించీ ఆలోచించడంలేదు. అసలు రాష్ట్రంలో ఏం జరుగుతోందన్నదానిపై వారికి ఖచ్చితమైన అభిప్రాయమంటూ ఏమీ లేదు.

ఇలాంటి సమయంలో, ప్రభుత్వం తరఫున అమరావతి రైతుల్ని రెచ్చగొట్టే చర్యలెందుకు.? మంత్రులు రంగంలోకి దిగి, అమరావతిపై జుగుప్సాకరమైన వ్యాఖ్యలు చేయడమెందుకు.? తమ ప్రభుత్వం మూడు రాజధానులకు కట్టుబడి వుందని ముఖ్యమంత్రి వైఎస్ జగన్ చెప్పాక.. అందులో ఒకటైన అమరావతి విషయంలో మాత్రం మంత్రెలెందుకు ఇంతలా ‘అతి’ చేస్తున్నట్టు.?

అంటే, అధినేత నిర్ణయం మీద మంత్రులకు గౌరవం లేదన్నమాట. వైసీపీ ముఖ్య నాయకులెవరికీ తమ ముఖ్యమంత్రి విషయమై బాధ్యత లేదన్నమాట. ఇలా చర్చ జరుగుతోంది సోషల్ మీడియాలో.

అమరావతి రైతుల ఉద్యమానికి ఫ్రీ పబ్లిసిటీ ఇవ్వడమంటే కొరివితో తలగోక్కున్నట్లే.! ఔను, వైసీపీకి వేరే శతృవులే అవసరం లేదన్నట్టు తయారైంది పరిస్థితి.