ఆంధ్రప్రదేశ్లో స్థానిక ఎన్నికలు వాయిదా పడటానికి కారణం ఎవరు.? రాష్ట్ర ఎన్నికల ప్రధాన అధికారి చెబుతున్నదాన్ని బట్టి, కరోనా వైరస్ వల్లనే స్థానిక ఎన్నికలు వాయిదా పడ్డాయి. కానీ, అధికార వైఎస్సార్సీపీ వాదన ఇంకోలా వుంది. చంద్రబాబు కుట్రతోనే స్థానిక ఎన్నికలు ఆగిపోయాయని వైసీపీ అంటోంది.
కరోనా వైరస్ సంగతి పక్కన పెడితే, రాష్ట్రంలో అసలు స్థానిక ఎన్నికల ప్రక్రియ సజావుగా నడవడంలేదన్నది నిర్వివాదాంశం. ముఖ్యమంత్రి చెప్పినదాన్ని బట్టి చూసినా, 45 చోట్ల చెదురుమదురు సంఘటనలు జరిగాయి. వాస్తవ కోణంలో చూస్తే, పరిస్థితులు అత్యంత దారుణంగా తయారయ్యాయి.
వైసీపీ కార్యకర్తలు, చాలా చోట్ల టీడీపీగానీ, జనసేనగానీ, బీజేపీగానీ, వామపక్షాలుగానీ నామినేషన్లు వేయకుండా చేశారు. మహిళలని కూడా చూడకుండా అభ్యర్థుపై దాడులకు తెగబడ్డారు. ఏకంగా ఓ న్యాయవాది నెత్తి పగలగొట్టేశారు వైసీపీ కార్యకర్తలు. తమ పార్టీకి చెందిన కార్యకర్తలు ఇలా పెట్రేగిపోతోంటే, ముఖ్యమంత్రి ‘చెదురుమదురు సంఘటనలు’ అని లైట్ తీసుకోవడమేంటి.?
అసలు ఎన్నికలు సజావుగా సాగడంలేదు.. తక్షణం ఎన్నికలు నిలిపేయాలంటూ బీజేపీ నేతలు నినదించారు. కానీ, ఆ దిశగా ముఖ్యమంత్రి నుంచిగానీ, అధికార వైసీపీ ముఖ్య నేతల నుంచిగానీ బీజేపీ మీద ఒక్కటంటే ఒక్క విమర్శ కూడా రాలేదు. బీజేపీ రాష్ట్ర అధ్యక్షుడు కన్నా లక్ష్మినారాయణ మీద మాత్రం ‘చంద్రబాబు తొత్తు’ అనే విమర్శలు చేస్తున్నారు. ఏం, అదే ‘తొత్తు’ అన్న పదాన్ని, ప్రధాన మంత్రి మీదనో, బీజేపీ జాతీయ అధ్యక్షుడి మీదనో ఎందుకు ప్రయోగించడంలేదు.? అలా ప్రయోగిస్తే, ఆ తర్వాత ఏం జరుగుతుందో వైసీపీ నేతలకు బాగా తెలుసు.
నామినేషన్లు వేసే అవకాశం రాజకీయ పార్టీలకు లేనప్పుడు, అసలు అది ఎన్నిక ఎలా అవుతుంది.? ‘టీడీపీకి అభ్యర్థులే దొరకడంలేదు..’ అని వైసీపీ నేతలు చేస్తున్న విమర్శల్లో నిజమెంతో ఆ పార్టీ నేతలకే బాగా తెలుసు. కేంద్ర ప్రభుత్వ స్థాయి అధికారులతో చర్చలు జరిపిన తర్వాతనే, ఎన్నికల వాయిదా నిర్ణయం తీసుకున్నట్లు రాష్ట్ర ఎన్నికల ప్రధాన అధికారి ప్రకటించిన దరిమిలా, ముఖ్యమంత్రి వైఎస్ జగన్ మోహన్రెడ్డికి ‘చేవ’ వుంటే, ‘చేతనైతే’, కేంద్రాన్ని నిలదీయాలి. కానీ, అలా ప్రశ్నించే ధైర్యం ఆయనకుందా.? కరోనా వైరస్ పట్ల ఆందోళన అవసరం లేదు, పారాసిటమాల్ – బ్లీచింగ్ పౌడర్ సరిపోతుందని ప్రధానికి వైఎస్ జగన్ సవాల్ విసిరే పరిస్థితి వుందా.?
760704 399971I like this post, enjoyed this one regards for posting . 327224