వామ్మో.. ‘విసారె’కి ధనం మీద వ్యామోహమే లేదట.!

ఈ శతాబ్దపు అతి పెద్ద జోక్.. అని విజయసాయిరెడ్డి వ్యాఖ్యల గురించిన చర్చ జరుగుతోంది తెలుగు నాట. వైఎస్ జగన్ అక్రమాస్తుల కేసులో విజయసాయిరెడ్డి ఏ2 నిందితుడిగా వున్నారు. వేల కోట్ల రూపాయల అక్రమార్జన.. అన్న కోణంలో కేసులు నమోదైన విషయం విదితమే. సూట్ కేస్ కంపెనీల సృష్టి, నిధుల మళ్ళింపు.. తండ్రి అధికారాన్ని అడ్డం పెట్టుకుని ఇష్టమొచ్చినట్లు బొక్కేశారు.. ఇవన్నీ రాజకీయ ఆరోపణలు కాదు, సాక్షాత్తూ సీబీఐ, ఈడీ వంటి అత్యున్నత విచారణ సంస్థలు చేస్తున్న అభియోగాలు.

సరే, వైఎస్ జగన్ అయినా.. విజయసాయిరెడ్డి అయినా నేరానికి పాల్పడ్డారా.? లేదా.? అన్నదానిపై అంతిమంగా తేల్చాల్సింది న్యాయస్థానాలేననుకోండి.. అది వేరే సంగతి. విజయసాయిరెడ్డి ప్రస్తుతం రాజ్యసభకు ప్రాతినిథ్యం వహిస్తున్నారు. వైసీపీ జాతీయ ప్రధాన కార్యదర్శి ఆయన. అంతేనా, ముఖ్యమంత్రి వైఎస్ జగన్ మోహన్ రెడ్డి సూచనతో, ఉత్తరాంధ్రలోని మూడు జిల్లాల ‘బాగోగుల్ని’ చూసుకుంటున్నారు. అందులో విశాఖ అతి ముఖ్యమైన నగరం. విశాఖ అంటే విజయసాయిరెడ్డి.. విజయసాయిరెడ్డి అంటే విశాఖ.. అనేంత స్థాయిలో వైసీపీలో చర్చ జరుగుతోంది. మంత్రులైనాసరే, విజయసాయిరెడ్డి ముందు చేతులు కట్టుకుని నిల్చోవాల్సిందేననే భావన వైసీపీ వర్గాల్లో నెలకొంది.

విశాఖ కేంద్రంగా జరుగుతున్న అనేక భూ కుంభకోణాల్లో విజయసాయిరెడ్డి సెంటర్ ఆఫ్ ఎట్రాక్షన్.. అని ఉత్తరాంధ్రలో ఓ బలమైన వాదన వినిపిస్తోంది. ఈ నేపథ్యంలో విజయసాయిరెడ్డి తనకు ధనం మీద వ్యామోహం లేనే లేదని, విశాఖలో సెంటు భూమి కూడా తన పేరుతో లేదనీ సెలవిచ్చారు. రాజకీయ నాయకులెవరన్నా తమ పేర్లతో భూముల్ని, కార్లనీ, బంగ్లాల్నీ కొనుగోలు చేస్తారా.? అంతెందుకు, చంద్రబాబు జేబులో వంద రూపాయల నోటు కూడా వుండదు. అదే రాజకీయం అంటే.

నిజంగానే విజయసాయిరెడ్డికి విశాఖలో సెంటు భూమి కూడా లేదా.? ఆయనకు డబ్బు మీద వ్యామోహం లేదా.? అన్న విషయమై వైసీపీ వర్గాల్లోనే ‘చిత్ర విచిత్రమైన అభిప్రాయాలు’ వున్నాయి. టోల్ ఫ్రీ నెంబర్ ఏర్పాటు చేసి మరీ ఫిర్యాదులు స్వీకరిస్తారట విజయసాయిరెడ్డి.. తనపై ఆరోపణలకు సంబంధించి. ఇది ఇంకా విచిత్రం మరి.