హాలీవుడ్‌లో తెలుగు సినిమా పరువు తీసేస్తున్నారు.!

రామ్ చరణ్ ‘హాలీవుడ్ క్రిటిక్స్ అసోసియేషన్’ పురస్కారాల ప్రదానోత్సవానికి హాజరైతే, ప్రెజెంటర్‌గా వ్యవహరిస్తే.. తెలుగునాట ఎవరికో ఎందుకు నొప్పి పుట్టాలి.? గత కొద్ది రోజులుగా సోషల్ మీడియా వేదికగా చాలా ఛండాలం నడుస్తోంది.. ఎన్టీయార్ అభిమానుల ముసుగులో. ఎవరు చేస్తున్నారిదంతా.? దీనికోసం ఎంత ఖర్చు చేస్తున్నారు.?

ఆస్కార్ పురస్కారాల కోసం ఎన్టీయార్ కూడా విదేశాలకు వెళతాడు కదా.! అక్కడ ఆయనకు లభించే గౌరవాన్ని చూసి ఎవరైనా కుళ్ళకుంటే ఎలా వుంటుంది.? ఇక్కడ విషయం రామ్ చరణ్, ఎన్టీయార్ మాత్రమే కాదు. తెలుగు సినిమా.! తెలుగు సినిమా ఘనత గురించి ప్రపంచం మాట్లాడుకుంటోంది.

హాలీవుడ్ క్రిటిక్స్ అసోసియేషన్ అవార్డుల జ్యూరీ మెంబర్ ఒకరు చరణ్ గురించి గొప్పగా మాట్లాడారు. అంతే, ఆమె మీద జూనియర్ ఎన్టీయార్ అభిమానుల పేరుతో కొందరు మొరగడం మొదలు పెట్టారు. ఆమెను నానా దుర్భాషలాడారు. ఆమె డబ్బులు తీసుకుని, చరణ్‌ని పొగిడిందన్నారు.

దాంతో, ఆమె బాధపడింది. ఆమె పేరు మోనికా గ్లెబర్‌మేన్. సోషల్ మీడియా వేదికగా తనపై జరుగుతున్న ట్వీట్ల దాడిపై ఆవేదన వ్యక్తం చేసింది. తనకెవరూ డబ్బులు ఇవ్వలేదనీ, ‘ఆర్ఆర్ఆర్’ సినిమాపై తన అభిమానం, అలాగే రామ్ చరణ్ పట్ల అభిమానం తనకు ముందు నుంచీ వున్నాయని పేర్కొంది.

అయినాగానీ, ఎన్టీయార్ ఫ్యాన్స్ ముసుగులో కొందరు ‘లేకితనం’ ప్రదర్శించారు. దాంతో, ఆమె ఇకపై ‘ఆర్ఆర్ఆర్’ గురించి ప్రస్తావించకూడదనే నిర్ణయానికి వచ్చింది. మరోపక్క, ఆమెకు క్షమాపణ చెప్పారు రామ్ చరణ్ అభిమానులు. ‘మిమ్మల్ని కొందరు పనిలేనోళ్ళు ఏవో అంటే, మీరెందుకు బాధపడతారు.?’ అంటూ ఆమెకు ధైర్యం చెప్పే ప్రయత్నం చేశారు.

కాగా, మోనిక గ్లెబర్‌మేన్ ‘హెచ్‌సిఎ’ అవార్డుల ప్రదానోత్సవంలో ‘చరణ్’ అన్న పదాన్ని పలకడానికి ఇబ్బంది పడిన సంగతి తెలిసిందే. ‘రామ్’ అని మాత్రం పేర్కొన్నారు. ఆ తర్వాత కొందరు, ‘చరణ్’ ప్రొనౌన్షియేషన్ గురించి చెప్పాక.. రామ్ చరణ్.. అని ప్రస్తావించారు.

మొత్తమ్మీద, తెలుగు సినిమాపై పగబట్టేసిన ఓ వర్గం, అంతర్జాతీయ స్థాయిలో తెలుగు సినిమా ప్రతిష్టను దిగజార్చుతోందన్నమాట. వీరికి ఎన్టీయార్ మీద సైతం అభిమానం వుందని అనుకోలేం..