మాకు కూడా పరీక్షలు వద్దు బాబోయ్‌ అంటున్న తెలుగు విద్యార్థులు

కరోనా మహమ్మారి పలు రంగాలపై తీవ్ర ప్రభావం చూపింది. అందులో ఒకటి విద్యారంగం. విద్యార్థుల జీవితాలతో ఈ మహమ్మారి ఆట ఆడుకుంటుంది అనడంలో ఎలాంటి సందేహం లేదు. ఒక సంవత్సర కాలంను వృదా అయ్యేలా చేస్తుంది. విద్యార్థుల జీవితంలో ఒక సంవత్సరం అంటే ఎంత విలువైనదో ప్రత్యేకంగా చెప్పనక్కర్లేదు. ఈ విపత్తు సమయంలో పరీక్షలు నిర్వహించలేము అంటూ కొన్ని రాష్ట్రాలు ప్రకటించగా కొన్ని రాష్ట్రాలు మాత్రం జాగ్రత్తలు తీసుకుంటూ పరీక్షల నిర్వహణకు సిద్దం అయ్యాయి.

మహారాష్ట్ర ప్రభుత్వం ఇప్పటికే పలు పరీక్షలను రద్దు చేసి విద్యార్థిని విద్యార్థులను ప్రమోట్‌ చేస్తున్నట్లుగా ప్రకటించగా కర్ణాటక విద్యార్థులు కూడా తమకు పరీక్షలు వద్దంటూ ప్రచారం మొదలు పెట్టారు. పరీక్షల కంటే జీవితం ముఖ్యం, ఈ విపత్తు సమయంలో పరీక్షలు అంటూ పెడితే వైరస్‌ మరింతగా విజృంభించి బంగారు భవిష్యత్తు ఉన్న విద్యార్థిని విద్యార్థుల పాలిట శాపంగా మారుతుందని వారు ఆందోళన చేస్తున్నారు. కర్ణాటక విద్యార్థుల తరహాలోనే తెలుగు విద్యార్థులు కూడా తమకు పరీక్షలు వద్దు బాబోయ్‌ అంటూ సోషల్‌ మీడియా ద్వారా ప్రచారం మొదలు పెట్టారు.

ప్రస్తుతం ఉన్న ఈ సమయంలో భవిష్యత్తు గురించి ఆలోచించడం అవివేకం అవుతుంది. అసలు భవిష్యత్తు ఉంటుందా లేదా అనే విషయం గురించి ఆలోచించాలంటూ విధ్యార్థులు అంటున్నారు. భవిష్యత్తు అనేది ఉంటే అప్పుడు ఏమైనా చేయవచ్చు. ఇప్పుడే భవిష్యత్తు గురించి ఆలోచిస్తే అసలు భవిష్యత్తు ఉండకుండా పోవచ్చు అంటూ కొందరు విద్యార్థులు లాజికల్‌గా నెట్టింట పోస్టులు పెట్టి పరీక్షలను తప్పించుకునేందుకు ప్రయత్నిస్తున్నారు. తెలుగు రాష్ట్రాల్లో పలు కాలేజ్‌లు ఆన్‌ లైన్‌ ద్వారా క్లాస్‌లు నిర్వహించి పరీక్షలు పెట్టేందుకు సిద్దం అవుతున్నాయి.

కొన్ని కాలేజ్‌లు ఆన్‌లైన్‌ ద్వారా పరీక్షలకు సిద్దం అవుతుండగా మరి కొన్ని కాలేజ్‌లు మాత్రం పాత విధానంలోనే సామాజిక దూరం పాటిస్తూ పరీక్షలు నిర్వహించాలని అంటున్నారు. ఆ పరీక్షలను తప్పించుకునేందుకు కొందరు సోషల్‌ మీడియాలో పరీక్షలు వద్దు భవిష్యత్తు ముద్దు అంటూ ప్రచారం చేస్తున్నారు. కాని తెలుగు రాష్ట్రాల ప్రభుత్వాలు మాత్రం పరీక్షలు పెట్టకుండా ప్రమోట్‌ చేసేందుకు మాత్రం ఎట్టి పరిస్థితుల్లో ఒప్పుకునే పరిస్థితి కనిపించడం లేదు.