నిమజ్జనంపై ఉత్కంఠ..! హైకోర్టు తీర్పును సుప్రీంలో సవాల్ చేసిన తెలంగాణ

హైదరాబాద్ గణేశ్ నిమజ్జనంపై ఉత్కంఠ కొనసాగుతోంది. హైకోర్టు ఇచ్చిన తీర్పును రాష్ట్ర ప్రభుత్వం సుప్రీంలో సవాల్ చేయడంతో సర్వత్రా ఆసక్తి నెలకొంది. సాగర్ లో విగ్రహాల నిమజ్జనంపై న్యాయవాది మామిడాల వేణుమాధవ్ వేసిన పిటిషన్ ను విచారించిన తెలంగాణ హైకోర్టు కీలక తీర్పునిచ్చింది. ప్లాస్టర్ ఆఫ్ పారిస్ తో చేసిన విగ్రహాలను సాగర్ లో నిమజ్జనం చేయొద్దని.. హెచ్ఎండీఏ ఏర్పాటు చేసిన 25 ప్రత్యేక కుంటల్లో నిమజ్జనం చేయాలని స్పష్టం చేసింది.

దీంతోపాటు ట్యాంక్ బండ్ వైపు కాకుండా పీవీ మార్గ్, నెక్లెస్ రోడ్, సంజీవయ్య పార్క్ వైపున.. సాగర్ లో ప్రత్యేక రబ్బర్ డ్యామ్ ఏర్పాటు చేసి అక్కడ నిమజ్జనం చేయాలని ఆదేశించింది. ఈ తీర్పును పునఃసమీక్షించాలని ప్రభుత్వం విజ్ఞప్తి చేసినా తోసిపుచ్చింది. దీంతో ఈ తీర్పును సవాల్ చేస్తూనే తెలంగాణ ప్రభుత్వం సుప్రీంకోర్టును ఆశ్రయించింది. రేపు ఉదయం సుప్రీంకోర్టు చీఫ్ జస్టిస్ ధర్మాసనం ముందు గణేశ్ నిమజ్జనం అంశాన్ని ప్రభుత్వం ప్రస్తావించనుంది.