ఆస్తిలో ఆడపిల్లలకు సమాన హక్కు ఉండాల్సిందే.. సుప్రీం సంచలన తీర్పు

ఆడపిల్లలకు ఆస్తిలో సమాన హక్కు కల్పించాల్సిందేనని సుప్రీం కోర్టు కీలక తీర్పు ఇచ్చింది. హిందూ వారసత్వ సవరణ చట్టం పై సుప్రీంకోర్టు ఈ కీలక తీర్పు ఇచ్చింది. ఈమేరకు దాఖలైన వేర్వేరు పిటిషన్లను విచారించిన అనంతరం ఈ తీర్వు ఇచ్చింది. తీర్పు అమల్లోకి వచ్చే నాటికి తండ్రి బ్రతికి ఉన్నా లేకపోయినా ఆడపిల్లలకు ఆస్తిలో సమాన వాటా ఇవ్వాలని స్పష్టం చేసింది. ఆస్తి పంపకాల్లో కొందరు తల్లిదండ్రులు పక్షపాత ధోరణితో వ్యవహస్తున్నారనే ఆరోపణలపై సుప్రీం ఈ తీర్పు వెలువరించింది.

తీర్పులో భాగంగా హిందూ వారసత్వ సవరణ చట్టం 2005 కింద 2005 సెప్టెంబర్ 9 నాటికి తండ్రి బ్రతికి ఉన్నా లేకపోయినా సరే ఆడ పిల్లలకు ఆస్తిలో సమాన హక్కు ఉండాలని తీర్పు ఇచ్చింది. ఈమేరకు జస్టిస్ అరుణ్ మిశ్రా నేతృత్వంలోని త్రిసభ్య ధర్మాసనం ఈ తీర్పు వెల్లడించింది. తీర్పు సందర్భంగా ప్రకాశ్ వర్సెస్ పులవతి కేసులో తుది తీర్పును ఈ సందర్భంగా జస్టిస్ అరుణ్ మిశ్రా ప్రస్తావించారు.

ఈ కేసులో బాధితురాలి తండ్రి 1999 డిసెంబర్ 11న మరణించారు. ఆస్తి హక్కు సవరణ 2005లో జరిగింది. ఈ చట్టం అమల్లోకి వచ్చే తేదీని ప్రామాణికంగా తీసుకుంటే పులవతికి ఆస్తిలో సమాన హక్కు దక్కదని ప్రతివాదులు వాదించారు. భిన్న వాదనలు విన్న కోర్టు ఆడపిల్ల ఇంట్లో ఉంటే సమాన హక్కు ఉండాల్సిందేనంటూ తీర్పు వెలువరించింది. 1956 నాటి హిందూ వారసత్వ చట్టం 2005లో సవరణలు జరిగాయి. ఆ ఏడాది సెప్టెంబర్ 9న ఈ చట్టానికి పార్లమెంటులో ఆమోదం లభించింది.