కరోనా గుప్పిట్లో చైనా..! షాంఘైలో నెగటివ్ వచ్చినా నగరం నుంచి బయటకే..

చైనా ఆర్ధిక రాజధాని షాంఘైలో కొన్నిరోజులుగా కరోనా అల్లకల్లోలం సృష్టిస్తోంది. రోజూ వేల సంఖ్యలో కేసులు నమోదవుతున్నాయి. సోమవారం ఒక్కరోజే నగరంలో 7వేలకు పైగా కొత్త కేసులు నమోదవగా.. 36 మంది మృతి చెందారు. నగరంలో మూడంచెల కట్టుదిట్టమైన లాక్ డౌన్ ఆంక్షల మధ్య ప్రజలు జీవిస్తున్నారు. ఇళ్లలోని కాంపౌండ్ లోకి కూడా రాకుండా ఇనుప కంచెలు నిర్మిస్తున్నారు. దీంతో లక్షలాది మంది ఇళ్లకే పరిమితం అవుతున్నారు.

కరోనా పరీక్షల్లో నెగటివ్ వచ్చినా స్థానిక ప్రజలకు కష్టాలు తప్పడం లేదని తెలుస్తోంది. కరోనా వ్యాప్తి ఎక్కువగా ఉండటంతో నెగటివ్ వచ్చిన వారికి వైరస్ సోకకుండా ఉండేందుకు నగరం నుంచి బయటి ప్రాంతాలకు తరలిస్తున్నారని తెలుస్తోంది. ఏకంగా షాంఘైకు 400 కిలోమీటర్ల దూరంలో ఏర్పాటు చేసిన ప్రత్యేక కేంద్రాలకు తరలిస్తున్నారు. అక్కడ క్యాబిన్స్ ఏర్పాటు చేసి ఉంచుతున్నారు. చైనా ప్రభుత్వ తీరుపై మండిపడుతూనే.. మరో అవకాశం లేదని ప్రజలు వాపోతున్నారు. మరోవైపు.. రాజధాని బీజింగ్ లో కూడా కరోనా కేసులు పెరుగుతున్నట్టు తెలుస్తోంది.