మండలి రద్దుపై రఘురామ పోరాటం.. కేంద్రం ఏమంటుందో.!

రాజధాని అమరావతి విషయంలో కేంద్రం జోక్యం చేసుకోవడంలేదు.. కానీ, కేంద్రం ఈ వ్యవహారంపై ఓ కన్నేసి వుంచిందని వైసీపీ రెబల్ ఎంపీ రఘురామకృష్ణరాజు చెబుతున్నారు. నిజానికి, రాష్ట్రానికి సంబంధించి కీలక విషయాల్లో కేంద్రం వ్యూహాత్మక మౌనం పాటిస్తోంది. ఆ వ్యూహాత్మక మౌనాన్ని రాష్ట్రంలోని అధికార వైసీపీ తనకు అనుకూలంగా మార్చుకుంటోంది.

రాజధాని విషయాన్నే తీసుకుంటే, ‘రాజధాని మార్పుతో మాకు సంబంధం లేదు.. అని కేంద్రమే చెప్పింది గనుక.. కేంద్రంతో మా సఖ్యతకు ఇదే నిదర్శనం.. మా నిర్ణయాలకు కేంద్రం మద్దతిస్తోంది..’ అని వైసీపీ ప్రచారం చేసుకుంటున్న విషయం విదితమే. మరి, శాసన మండలిని ఎందుకు రద్దు చేయలేదు.? ప్రత్యేక హోదా ఎందుకు రాలేదు.? రైల్వే జోన్ ఎందుకు ముందుకు నడవడంలేదు.? పోలవరం ప్రాజెక్టుకి కేంద్రం నిధుల్ని ఇంకా ఎందుకు పెండింగులో వుంచుతోంది.? కడప స్టీలు ప్లాంట్, దుగరాజపట్నం పోర్టు వ్యవహారాలేమిటి.? వంటి ప్రశ్నలు తెరపైకి వస్తే మాత్రం.. అధికార వైసీపీ మౌనం దాల్చుతుంటుంది.

ఇదిలా వుంటే, కేంద్ర ప్రభుత్వ పెద్దల దగ్గర వైసీపీ రెబల్ ఎంపీ రఘురామకి మంచి పలుకుబడే వుంది. కానీ, అది భేటీల వరకే పరిమితం.. అని పలు సందర్భాల్లో నిరూపితమయ్యింది. గడచిన ఏడాదిన్నర కాలంలో రఘురామ, కేంద్రానికి చాలా ఫిర్యాదులు చేశారు.. రాష్ట్ర ప్రభుత్వంపైన. వాటిల్లో ఒక్క విషయంలో అయినా రఘురామకి అనుకూలంగా పరిస్థితులు కనిపించాయా.? లేదే.! కానీ, శాసన మండలి రద్దు విషయంలో తాను పార్లమెంటు స్థాయిలో పోరాటం చేస్తానంటున్నరు రఘురామ.

అంతేనా, వైసీపీ తరఫున నిబద్ధత గలిగిన నాయకుడిగా, శాసన మండలి రద్దు కోసం నినదిస్తానన్నారు. గతంలో శాసన మండలి రద్దు దిశగా వైసీపీ నిర్ణయం తీసుకున్న మాట వాస్తవం. ఆ దిశగా అసెంబ్లీలో తీర్మానం కూడా జరిగింది. శాసన మండలి అంటే ఖర్చు దండగ వ్యవహారం అన్నదీ ముఖ్యమంత్రి వైఎస్ జగన్ మోహన్ రెడ్డినే. అదే జగన్, శాసన మండలికి తమ పార్టీ నుంచి నేతల్ని పంపుతున్నారు.. ప్రత్యేకంగా నామినేట్ చేస్తూ. త్వరలో జరిగే పార్లమెంటు సమావేశాల్లో ఈ అంశాన్ని లేవనెత్తుతానంటూ రఘురామ, ముఖ్యమంత్రికి రాసిన లేఖతో అధికార పార్టీలో చిన్నపాటి కుదుపు కనిపిస్తోంది.

‘మేం ఆ రద్దు విషయమై కేంద్రంపై ఒత్తిడి తీసుకురాం..’ అని మాత్రమే వైసీపీ సెలవిచ్చింది. ఎవరి భయాలు వాళ్ళవి. రద్దు చేస్తే.. మండలి పదవులు పొందిన నేతల నుంచి వ్యతిరేకత రాకుండా వుంటుందా.?